|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 244 Hüküm no: 231 Orijinal metin no: [20b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Süleyman’ı Mercan çarşısı yakınında yaralayan Mehmed b. Abdullah ile sulh olduğu
Sulh Mahmiye-i İstanbul’da Mercan sûku kurbunda vâki‘ Hoca Kepçe mahallesinde sâkin Mehmed b. Süleyman meclis-i şer‘-i hatîr-i lâzımü’t-tevkīrde hâfızü’l-vesîka Mehmed b. Abdullah mahzarında ikrâr-ı tâm ve takrîr-i kelâm edip târih-i kitâbdan yirmi yedi gün mukaddem mezbûr Mehmed bıçkı ta‘bîr olunur âlet-i cârihe ile sol pazum üzerine vurup beni mecrûh etmekle mûcebini mezbûrdan taleb ve da‘vâ eylediğimde ol dahi inkâr eylediğinden sonra müdde‘âmı ba‘de’l-isbât vesâtat-ı muslihîn ile da‘vâ-yı meşrûhumdan benimle mezbûr Mehmed beş yüz akçe üzerine inşâ-i akd-i sulh eylediğinde, ben dahi sulh-ı mezbûru kabûl ve bedel-i sulh-ı mezbûru yedinden tamâmen alıp kabz edip min ba‘d cirâha-yı merkūmeye müte‘allika da‘vâdan mezbûrun zimmetini ibrâ-i âm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve[‘l-ışrîn min şehri] Şevvâli’l-mükerrem li sene selâse ve seb‘în ve elf.
Şuhûdü’l-hâl: İbrahim Beşe b. Mehmed er-Râcil, Hüseyin Beşe b. Abdullah, Abdülbâkī Beşe b. Mustafa, Osman Beşe b. İsmail, Halil Beşe b. Mehmed.
|