.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 247
Hüküm no: 236
Orijinal metin no: [21a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Rüstem Paşa evkafından olan Zincirlikuyu yakınlarındaki hamamın tasarruf hakkının Abdurrahman Çelebi b. Mehmed Efendi’ye tefvîz edildiği

Ferâğ-ı hamam Mahmiye-i İstanbul’da Zincirlikuyu kurbunda vâki‘ merkūm Rüstem Paşa evkāfından olup vâkıfına intimâ ile tecdîdden müstağnî hamama icâre-i mu‘accele ve müeccele ile mutasarrıf olan el-Hâc Mustafa b. el-Hâc Ali meclis-i şer‘-i hatîrde işbu kitâbın sâhibi Abdurrahman Çelebi b. Mehmed Efendi mahzarında ikrâr ve takrîr-i kelâm edip târih-i kitâbdan dört ay mukaddem hamam-ı mezbûrun hakk-ı karâr ve tasarrufunu evkāf-ı mezbûre mütevellîsi Receb Ağa izin ve ma‘rifetiyle mezbûr Abdurrahman Çelebi’ye ferâğ ve tefvîz, ol dahi ber minvâl-i muharrer tefevvüz ve kabûl eyledikden sonra silk-i mülkümde münselik olup hamam-ı mezbûrun içinde mevcûd cins ve adedi beynimizde ilm-i şer‘î ile ma‘lûm peştemâl ve havlu ve tas ve aynayı ve ma‘lûmü’l-mikdâr odunu ve sâir kalîl ve kesîr âlât-ı hamamı iki bin riyâlî guruş ve iki bin esedî ki cem‘an dört bin kıt‘a guruşa mezbûr Abdurrahman Çelebi’ye safka-i vâhide ile bey‘ ve teslîm ol dahi vech-i muharrer üzre iştirâ ve kabûl ve kabz eyledikden sonra semenleri olan meblağ-ı mezbûr dört bin guruşu vech-i muharrer üzre yedinden tamâmen alıp kabz etmiş idim hâlâ eşyâ-i mezkûre mezbûrun mülkü ve hamam-ı mezbûr hakk-ı tasarrufudur, benim kat‘â alâka ve medhalim yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Zilka‘deti’ş-şerîfe li sene selâse ve seb‘în ve elf.


Şuhûdü’l-hâl: Fahrü’l-müderrisîn Şeyhzâde Mehmed Efendi ve Mehmed Efendi ve İbrahim Çelebi el-Müezzin ve Musa Beşe b. Ömer ve Mustafa Çelebi b. Murad ve Maden Çelebi b. Mehmed, Hasan Bey b. Ömer Bey, Zülfikār Çelebi b. Abdullah, Abdülvehhab b. İsmail, el-Hâc Ahmed b. Mahmud, Abdi Çelebi [b.] Hüseyin ve gayruhüm.