|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 254 Hüküm no: 248 Orijinal metin no: [22a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Anadolu kazaskeri Mehmed Esad’ın vârislerinden kızı Şerife Rahime’nin menzil hissesini kardeşi Mehmed Ebussuud’a sattığı
Bey‘-i hisse Mahmiye-i İstanbul’da Dülgerzâde mahallesinde sâkin sâbıkan Anadolu kazaskeri olup ba‘dehû vefât eden dâric-i medâric-i rahmet-i hay ve samed Mehmed Esad Efendi’nin verâseti mahdûm-ı âlî-kadrleri umdetü’l-ulemâ’i’l-a‘lâm, zübdetü’l-mevâliyyü’l-izâm es-Seyyid Mehmed Said Efendi ile diğer mahdûm-ı mükerremleri muhtârü’l-müderrisîni’l-kirâm es-Seyyid Mehmed Ebussuûd Efendi’ye ve kerîme-i mükerremeleri mefâhirü’l-muhadderât Şerife Rahime ve Şerife Atika ve Şerife Râbia’ya münhasıra ve asl-ı mes’ele yedi sehimden olup ikişer sehmi müşârün-ileyhimâ es-Seyyid Mehmed Said Efendi ile es-Seyyid Mehmed Ebussuûd Efendi’ye ve birer sehmi esâmîleri zikr olunan üç nefer kerîmelerine isâbet ettiği şer‘an zâhir oldukdan sonra, müşârün-ileyh Şerife Rahime tarafından husûs-ı âti’z-zikri ikrâra vekîl olup zâtını ma‘rifet-i şer‘iyye ile ârifler olan Mehmed Efendi b. Süleyman ve İbrahim Çelebi b. Mehmed şehâdetleri ile şer‘an vekâleti sâbite olan kıdvetü’l-müderrisîni’l-kirâm Hâfız Mustafa Efendi b. Mehmed meclis-i şer‘-i hatîr-i lâzımü’t-tevkīrde işbu bâ‘isü’l-kitâb mûmâ-ileyh Mehmed Ebussuûd Efendi tarafından ikrâr-ı âti’l-beyânı tasdîke vekîl olup bi mâ hüve nehci’s-sübût vekâleti sâbite olan Ahmed Efendi b. el-Hâc Hasan mahzarında bi’l-vekâle ikrâr ve takrîr-i kelâm edip müvekkilem müşârün-ileyhâ Şerife Rahime müteveffâ-yı mûmâ-ileyhin terekesinden olup mahalle-i merkūmede vâki‘ lede’l-ahâlî ve’l-cîrân ma‘lûmü’l-hudûd olan mülk menzil arsasından ve enkāzından süb‘ hisse-i şâyi‘asını mûmâ-ileyh es-Seyyid Mehmed Ebussuûd Efendi’ye yalnız üç yüz elli esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm eyledikden sonra semeni olan üç yüz elli guruşu mûmâ-ileyh Mehmed Ebussuûd Efendi yedinden tamâmen ahz u kabz eyledi dedikde vekîl-i mesfûr Hâfız Mustafa Efendi’nin vech-i mübeyyen üzre vekâlete cârî olan ikrârını mezbûr Ahmed Efendi bi’l-vekâle vicâhen tasdîk ve şifâhen tahkīk etmeğin mâ vaka‘a bi’l-ibtigā ketb u imlâ olundu. Fî gurreti Zilka‘deti’ş-şerîfe li sene 1073.
Şuhûdü’l-hâl: Mustafa Efendi b. Ramazan Efendi, Ahmed Çelebi b. Derviş Efendi, Ali Çelebi b. Mehmed, Molla Şaban b. İbrahim, Molla Osman b. Mehmed.
|