|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 253 Hüküm no: 247 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Çelebi b. Abdülmennân’ın Hatice bt. Ali’den istediği yüklük bedelinde sulh olduğu
Sulh Mahmiye-i İstanbul’da Sarı Nasûh mahallesinde sâkin fahrü’l-akrân Ahmed Çelebi b. Abdülmennân mahfil-i kazâda, Hatîce bt. Ali nâm hâtun mahzarında ikrâr ve takrîr-i kelâm [edip], târih-i kitâb senesi şehr-i Ramazânı’nın yirminci gününde sâkin olduğum menzilimden, sîmden masnû‘ üç bin akçe kıymetli yüklüğümü keçesiyle ma‘an zâyi‘ edip keçesini işbu hâzır bi’l-meclis Hüseyin Beşe b. Mehmed yedinde bulup suâl eylediğimde mezbûre Hatîce’den ancak keçesini iki bin beş yüz akçeye iştirâ eyledim, sen mülkünden zâyi‘ eylediğin ma‘lûmum değildir deyû benim mülküm olduğunu inkâr edip ben dahi merkūm Hüseyin Beşe muvâcehesinde zikr olunan keçe yüklüğü ile ma‘an benim mülküm olup mülkümden zâyi‘ olduğunu şuhûd-ı udûlle isbât ve zikr olunan yalnız keçemi ba‘de’l-hükm mezbûr Hüseyin Beşe yedinden almış idim hâlâ yüklüğünü dahi merkūm Hatîce’den bundan akdem da‘vâ ve taleb eylediğimde mezbûre Hatîce beni an inkâr bin beş yüz akçe üzerine vesâtat-ı muslihîn ile sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru tamâmen mezbûrenin yedinden ahz u kabz eyledikden sonra husûs-ı mezbûra müte‘allika da‘vâdan mezbûre Hatîce’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Mehmed Odabaşı b. Mustafa, Receb Beşe b. Osman, Hüsrev b. Abdullah, Hasan Beşe b. Mehmed, İsâ b. Dede, Ali Bey b. Abdullah, Mehmed b. Ramazan, Şükrullah b. Mustafa.
|