|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 255 Hüküm no: 250 Orijinal metin no: [22a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa b. Ali’nin, Şermet isimli çobanda olan alacağına Dimitri v. Yani’nin kefil olduğunu ispatlayamadığı
Yemîn Mahmiye-i İstanbul’da Tahtaminâre mahallesi ahâlîsinden olup kendi nefsinden asâleten ve şerîki Mustafa b. Ali tarafından husûs-ı âti’z-zikre vekîl olup nehc-i şer‘î-i mu‘teber üzre vekâleti sâbite olan Musa b. Mehmed nâm kimesne meclis-i şer‘-i hatîr-i lâzımü’t-tevkīrde Dimitri v. Yani nâm zimmî muvâcehesinde bi’l-vekâle üzerine da‘vâ edip gāib ani’l-meclis Şermet v. ( ) nâm zimmî çobanda deyn-i şer‘îden olan otuz bin sekiz yüz akçe hakkıma mezbûr Dimitri kefîl olmağla meblağ-ı mezbûru kefâletine binâ’en mezbûr zimmîden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsı için beyyine taleb olundukda ityân-ı beyyineden âciz olup istihlâf edip meblağ-ı mezbûra kefîl olmadığına mezbûr Dimitri zimmîye yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin mezbûr Musa bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis min Zilka‘deti’ş-şerîfe li sene 1073.
Şuhûdü’l-hâl: Mehmed Çavuş b. Yusuf, İsmail Çelebi b. Mehmed, çukadar Ali Beşe, Abdi Çelebi el-Muhzır, Mustafa Beşe b. Rıdvan, Şükür Bey el-Muhzır.
|