.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 256
Hüküm no: 251
Orijinal metin no: [22a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Rumeli’deki Kartine kazasının Voltaşenk ve Korfaşlaya köyleri Aşar mültezimleri Nikola v. Senadino ve Kostantin’in, İbrahim Bey b. Mahmud’u kendilerine ortak ettikleri

Teşrîk Mahmiye-i İstanbul’da Kumkapı kurbunda sâkin Nikola v. Senadino ve Kostantin v. ( ) nâm zimmîler meclis-i şer‘-i hatîrde râfi‘ü’l-vesîka İbrahim Bey b. Mahmud muvâcehesinde her biri takrîr-i kelâm edip vilâyet-i Rumeli’de Kartine kazâsına tâbi‘ Voltaşenk ve Korfaşlaya nâm karyelerin sipâhisi Mustafa Bey nâm kimesne bin yetmiş üç Martı ibtidâsından yetmiş dört Martı’na gelince, karyetân-ı mezbûretânın hâsıl olan mahsûlâtının a‘şârın ve sâir rüsûmâtın otuz dokuz bin akçeye ale’l-iştirâk bize deruhde biz dahi iltizâm ve meblağ-ı mezbûru ber vech-i peşîn teslîm etmiş idik hâlâ zikr olunan karyelerin a‘şârın ve yedimizde olan zabıt temessükü[nde] nâtık olduğu üzre rüsûmâtın sene tamâmına değin bizim ile iştirâk üzre zabt edip sene tamânında fâ’ide beynimizde ale’s-seviyye olmak üzre merkūm İbrahim Bey’i teşrîk ve kavl ve ittifâk eyledik ve bu husûs için merkūm İbrahim Bey bize dokuz bin akçe def‘ ve teslîm eyledi. Bu kavl ve ittifâkımız cânib-i şer‘de ketb ve tahrîr ve sûreti yedimizde def‘ olunmak matlûbumuzdur dedikde mezbûr İbrahim Bey merkūmânın kelimâtın ba‘de’t-tahkīk vâki‘ü’l-hâl bi’t-taleb ketb olundu. Fi’l-yevmi’s-sânî min Zilka‘deti’ş-şerîfe li sene selâse ve seb‘în ve elf.


Şuhûdü’l-hâl: Süleyman Bey b. Musa, el-Hâc Ebûbekir b. Mustafa, Ali Çelebi b. Mustafa, Osman bin Mustafa.