.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 257
Hüküm no: 253
Orijinal metin no: [22b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Çelebi b. Ahmed vârislerinin Osman Çelebi b. Derviş’de olan alacak iddiasında sulh oldukları

Sulh Mahmiye-i İstanbul’da el-Hâc Hamza mahallesi ahâlîsinden olup mukaddemâ vefât eden Mehmed Çelebi b. Ahmed’in verâseti zevce-i metrûkesi Şerife bt. Seyyid Ali’ye ve sulbî kebîr oğulları Seyyid Mustafa Çelebi ve Ahmed Çelebi’ye ve sulbiye sagīre kızı Fâtıma’ya münhasıra oldukdan sonra mezbûrun Şerife ve Seyyid Mustafa Çelebi ve Ahmed Çelebi asâleten ve mezbûre Fâtıma’nın mansûben vasiyy-i şer‘îsi olan Sinan Beşe b. Hasan vesâyeten meclis-i şer‘-i hatîr-i lâzımü’t-tevkīrde hâfızü’l-kitâb Osman Çelebi b. Derviş Mehmed mahzarında her biri ikrâr ve i‘tirâf edip müteveffâ-yı mezbûrun Tulumcu Mustafa Çelebi veresesinden bin riyâlî guruş asl-ı mâl ve yüz elli riyâlî guruş ribh-i şer‘î deyni olup ve mezbûr Osman Çelebi zimmetinde ol mikdâr riyâlî guruş hakkı olmağla meblağ-ı mezbûru verese-i merkūmun, ver deyû mezbûr Osman Çelebi’yi vekîl eylediğimizde, mezbûr dahi bin riyâlî guruş verip yüz elli riyâlî guruşu vermemekle merkūmun tekrâr bizden almağla, mezbûr Osman Çelebi’den da‘vâ eylediğimizde, mezbûr Osman Çelebi dahi tamâmen def‘ ve teslîmi iddi‘â eyledikde bizler inkâr edip ol dahi müdde‘âsını isbât sadedinde olup sulh bize ve sagīre-i merkūmeye nâfi‘ olmağla da‘vâ-yı merkūmeden an inkâr mezbûr Osman Çelebi ile on dört bin akçe üzerine sulh oldukda, ol dahi sulh-ı mezbûru kabûl ve bedel-i sulh olan on dört bin akçeyi mezbûr Osman Çelebi yedinden asâleten ve vesâyeten alıp kabz edip meblağ-ı mezbûrdan mezbûr Osman Çelebi’de bir akçe ve bir habbe bâkī kalmadı dediklerinde, mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem sene 1073.


Şuhûdü’l-hâl: Hüseyin Efendi el-Brusî kâtibü’l-vesîka, Mefharü’l-kuzât Mehmed Efendi b. Musa, Mehmed Çelebi b. el-Hâc Mustafa, Karatavuk Mehmed Çelebi, çukadar Ali Beşe, Mustafa Beşe b. Rıdvan, Abdi Çelebi el-Muhzır, Şükrullah Bey b. Mustafa.