.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 258
Hüküm no: 255
Orijinal metin no: [22b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Bayram Çavuş b. Mustafa’nın Mora Mutasarrıfı İsmail Paşa’da olan alacağının kefili Mehmed Çavuş b. Abdullah’dan tahsil edilmesi

Kefîle mekfûl-bihî edâya tenbîh Mahrûse-i Galata a‘mâlinden kasaba-i Tophâne’de Defterdâr Ebü’l-fazl mahallesi sükkânından râfi‘ü’l-kitâb Bayram Çavuş b. Mustafa meclis-i şer‘-i kavîm-i lâzımü’t-ta‘zîmde yine mahalle-i mezbûrede sâkin Mehmed Çavuş b. Abdullah muvâcehesinde da‘vâ edip hâlâ Mora sancağına mutasarrıf ve muhassılü’l-emvâl olan İsmail Paşa zimmetinde karzdan bin yüz riyâlî guruş ve altı re’s katır ve iki re’s at semenlerinden yedi bin guruş, cem‘an iki bin yüz riyâlî guruş hakkıma işbu merkūm Mehmed Çavuş kefâlet-i sahîha ile kefîl olmağla mukaddemâ merkūm Mehmed Çavuş meblağ-ı mezbûrun bin dört yüz yetmiş bir riyâlî guruşu mukābelesinde nakid otuz altı bin akçe ile beher kile on sekiz buçuk akçeden altı bin sekiz yüz keyl arpayı yüz yirmi beş bin sekiz yüz akçe ki cem‘an yüz altmış bir bin sekiz yüz akçesi bana def‘ ve teslîm edip ben dahi bin dört yüz yetmiş bir riyâlî guruş mukābelesinde ahz u kabz ve kabûl edip bâkī altı yüz yirmi dokuz riyâlî guruş hakkım mezbûr Mehmed Çavuş’da kefâleti hasebiyle taleb ederim deyicek gıbbe’s-suâl mezbûr Mehmed Çavuş cevâbında fi’l-vâki‘ müdde‘î-i mezbûr Bayram Çavuş’un vech-i muharrer üzre mezbûr İsmail Paşa zimmetinde olan her biri yedişer dirhem hesâbı üzre iki bin yüz riyâlî guruş hakkına kefîl olmuş idim. Kabzını i‘tirâf ettiği meblağ-ı mezbûrdan mâ‘adâ bâkī zimmetimde cihet-i kefâletden müdde‘î-i mezbûre altı yüz yirmi dokuz guruş ki her biri yedişer dirhemdir, deynimizdir deyû ikrâr ettikden sonra, mezbûr Bayram Çavuş beher guruşu yüz onar hesâbı üzre altı yüz yirmi dokuz guruş mukābelesinde altmış dokuz bin yüz doksan akçe almağa râzı olmağın ol mikdâr akçeyi müdde‘î-i mezbûra edâya kefîl-i mezbûra tenbîh olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Zilka‘deti’ş-şerîfe li sene 1073.


Şuhûdü’l-hâl: El-Hâc Ahmed Efendi b. Muharrem kâtib-i Dîvân-ı hümâyûn, Ahmed Bey el-Cündî Mehmed Çavuş b. Sefer, Ramazan Çavuş el-Mübâşir, Mustafa b. Davud, Abdi Çavuş b. Emrullah, Mehmed Çelebi b. el-Hâc İbrahim, Mehmed Ağa sermuhzırân.