|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 260 Hüküm no: 257 Orijinal metin no: [22b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hacı Mehmed b. Hüseyin’in Süleyman b. Hasan’da alacağı olduğunu ispat ettiği
İsbât-ı deyn Bâ‘isü’l-kitâb el-Hâc Mehmed b. Hüseyin meclis-i şer‘-i kavîmde mukaddemâ sefîne reisi olan Süleyman b. Hasan muvâcehesinde da‘vâ edip merkūm Süleyman zimmetinde karz-ı şer‘îden on sekiz bin yetmiş akçe hakkım olup hattâ karz-ı şer‘îden bana on sekiz bin akçe deyni olduğunu huzûr-ı müslimînde ikrâr dahi etmiş idi hâlâ meblağ-ı mezbûru mezbûr Süleyman’dan taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûr el-Hâc Mehmed’den1 müdde‘âsını mübeyyine beyyine taleb olundukda kasaba-i Kasımpaşa’da Piyâle Paşa Çeşmesi kurbunda sâkin Ramazan Beşe b. Receb ve İmâm Ömer Efendi b. Veli li ecli’ş-şehâde makām-ı kazâya hâzırân olup isre’l-istişhâd fi’l-vâki‘ merkūm Süleyman müdde‘î-i merkūm el-Hâc Mehmed’e karz-ı şer‘îden zimmetimde on sekiz bin yetmiş akçe deynim vardır deyû huzûrumuzda ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı mezbûr on sekiz bin yetmiş akçeyi müdde‘î-i mezbûra edâ ve teslîme mezbûr Süleyman’a tenbîh olunup mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Şevvâli’l-mükerrem sene 1073.
Şuhûdü’l-hâl: Süleyman Beşe b. Bayram el-Mübâşir, Mehmed Bey Bölükbaşı, Mustafa Beşe er-Râcil, Baba Resûl b. Rıdvan, Abdi Çelebi b. Hüseyin.
|