|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 261 Hüküm no: 259 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Efendi b. Ali’nin menzilini Yahya Efendi b. Ali Efendi’ye sattığı
Mülknâme Mahmiye-i İstanbul’da Mi‘mâr Şucâ‘ mahallesinde sâkin Dîvân-ı âlî -dâme merci‘an li’l-e‘âlî- kâtiblerinden umdetü erbâbi’t-tahrîr ve’l-kalem Mehmed Efendi b. Ali meclis-i şer‘-i hatîr-i lâzımü’t-tevkīrde işbu kitâb-ı sıhhat-nisâbın sâhibi umdetü’l-kuzâti’l-kirâm, zübdetü vülâti’l-enâm Yahya Efendi necli’l-merhûm Ali Efendi mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp, akd-i âtî sudûruna değin silk-i mülk-i sahîhimde münselik olup mahmiye-i mezbûrede Debbâğzâde mahallesinde vâki‘ bir tarafdan müşterî-yi mûmâ-ileyh menziline ve bir tarafdan ulemâya meşrût olan vakıf menzile ve tarafeyni tarîk-i âma müntehî iki bâb fevkānî odayı ve bir sofayı ve bir su kuyusunu ve kenîfi ve cüneyneyi müştemil ve bir terzi dükkânını hâvî menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î üç yüz kıt‘a esedî guruş ile seksen kıt‘a yaldız altınını mûmâ-ileyh Yahya Efendi’ye bey‘ ve teslîm ol dahi minvâl-i muharrer üzre iştirâ ve kabz eyledikden sonra, semeni olan meblağ-ı mezbûr üç yüz esedî guruş ile seksen yaldız altınını yedinden tamâmen alıp kabz eyledim min ba‘d menzil-i mezkûr mûmâ-ileyhin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Zilka‘deti’ş-şerîfe li sene selâse ve seb‘în ve elf.
Şuhûdü’l-hâl: Fahrü’l-kuzât İbrahim Efendi el-kadı bi İslimye sâbıkā, Fahrü’l-kuzât Mehmed Efendi, Fahrü’l-eimme Mustafa Efendi, Fahrü’l-kuzât Halil Efendi, Hâfız-ı kütüb Veli Efendi, Hüsam Efendi b. Receb, Hasan Çelebi b. Mehmed el-Müezzin, Mehmed Çelebi b. Veli Efendi, Zülfikār Bey, Celeb Mehmed Bey b. Sefer el-Attâr, Ahmed Beşe b. Mustafa seroda, Molla Ahmed b. Mehmed Efendi, Hüseyin Bey b. Receb.
|