.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 262
Hüküm no: 260
Orijinal metin no: [23a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hırsofi bt. Aleksi’nin, Ulaş köyündeki çiftliğini satmak üzre Cuharo v. Apostol’u vekil tayin ettiği

Vekâlet Vilâyet-i Rumeli’de medîne-i Yenişehir nevâhîsinden Fener nâhiyesine tâbi‘ Ulaş nâm karyede sâkine Hırsofi bt. Aleksi tarafından zikri âtî husûsa vekîl olup Ahmed b. Abdullah ve Dimo v. Yani şehâdetleriyle vekâleti sâbite olan Çuharo v. Apostol nâm zimmî meclis-i şer‘-i hatîrde müvekkile-i mezbûrenin zevci râfi‘ü’l-kitâb Aleksi v. Niko nâm zimmî muvâcehesinde bi’l-vekâle ikrâr ve i‘tirâf edip müvekkilem mezbûre Hırsofi zevcim mezbûr Aleksi’ye zimmetimde iki yük elli bin akçe lâzımü’l-edâ deynim vardır dedi dedikde gıbbe’t-tasdîki’ş-şer‘î vekîl-i mezbûr meclis-i mezbûrda takrîr-i kelâm edip müvekkile-i mezbûre Hırsofi zevci mezbûr Aleksi’ye olan deyn-i mezbûr için karye-i mezbûrede vâki‘ Çiftlik ve sâir emlâkini bey‘a beni tevkîl eyledikde ol çiftliği bey‘a ve semeninden deyn-i mezbûru edâya tevkîl eylemiş idi. Zikr olunan çiftlik bey‘ olundukda edâ-i deyne ta‘ahhüd etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem sene 1073.


Şuhûdü’l-hâl: Ahmed Bey b. Mehmed, Mustafa Bey b. Abdullah, Receb b. Abdullah, Ali Bey el-Kâtib, Abdi Çelebi b. Hüseyin.