|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 270 Hüküm no: 274 Orijinal metin no: [24a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Keresteci Mehmed Beşe b. Yunus’un Yorgi v. Yani’de kereste bedelinden alacağı olduğu
İsbât-ı deyn Mahmiye-i İstanbul’da Abdi Subaşı mahallesi sâkinlerinden Keresteci Mehmed Beşe b. Yunus mahfil-i kazâda Yorgi v. Yani muvâcehesinde üzerine da‘vâ ve takrîr-i kelâm edip merkūm Yorgi yedimden iştirâ ve kabz eylediği kereste semeninden mezbûrun zimmetinde beş bin dört yüz akçe hakkım olup hattâ târih-i kitâbdan iki ay mukaddem kendi menzilinde huzûr-ı müslimînde ikrâr ve işhâd dahi etmişdi. Suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden el-Hâc Ömer b. Ali ve Abdi Beşe b. Hüseyin nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Mehmed Beşe’ye kereste semeninden beş bin dört yüz akçe deyni olduğunu bizim huzûrumuzda kendi menzilinde merkūm Yorgi ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz [deyû] her biri edâ-i şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûl olmağın mûcebince meblağ-ı mezbûr beş bin dört yüz akçeyi müdde‘î-i mezbûr Mehmed’e edâ ve teslîme merkūm Yorgi’ye tenbîh birle mâ vaka‘a bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene selâse ve seb‘în ve elf.
Şuhûdü’l-hâl: Abdi Çelebi b. Hüseyin, Şükür b. Mustafa, Mustafa b. İsâ, Mehmed b. Ramazan, Resûl b. Rıdvan, Muharrem b. Abdi, Hasan b. Mehmed, Ali Çelebi el-Muhzır.
|