|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 269 Hüküm no: 273 Orijinal metin no: [24a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Habib’in Hasan Bey b. Sefer’den muhâlaa yoluyla boşandığı
Hul‘ Mahmiye-i İstanbul’da Şeyh Muhyiddin mahallesinde sâkine Fâtıma bt. Habîb nâm hâtun tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân Hasan Efendi b. Mustafa ve Hüseyin Beşe b. Mehmed şehâdetleri ile şer‘an vekâleti sâbite olan babası mezbûr Habîb b. Musa nâm kimesne mahfil-i kazâda, müvekkile-i mezbûrenin zevci işbu bâ‘isü’l-kitâb Hasan Bey b. Sefer nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûrenin mezbûr Hasan Bey zimmetinde mütekarrir ve ma‘kūdun-aleyh olan bin akçe mehr-i müeccelini ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre mezbûr Sefer Bey ile vekâletim hasebiyle muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete ve gayra müte‘allika da‘vâdan vekâletim hasebiyle ben mezbûr Sefer Bey’in zimmetini ve mezbûr Sefer Bey dahi müvekkilem mezbûre Fâtıma’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu.
Şuhûdü’l-hâl: İsâ b. Mehmed, el-Hâc Yusuf b. Musa, Hüseyin Çelebi b. Ebûbekir, İbrahim Çelebi b. Mehmed, el-Hâc Ahmed Çelebi b. Mahmud, Baba Resûl b. Rıdvan, Hasan Çelebi b. İbrahim, Abdi Çelebi b. Hüseyin.
|