|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 271 Hüküm no: 276 Orijinal metin no: [24a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mısırlı Mehmed b. Bulut’un kölesi olduğunu iddia ettiği Rus asıllı Kaytas b. Abdullah’ın azat edilmiş olduğu
Itâknâme Mahmiye-i İstanbul’da Manisalı Çelebi mahallesinde sâkin iken vefât eden Şem‘î bt. Hasan nâm hâtunun verâseti zevc-i metrûkü Mısırlı Mehmed b. Bulut ile li ebeveyn karındaşı Mustafa’nın sulbî kebîr oğlu Mehmed’e münhasıra oldukdan sonra, hâfızü’l-kitâb Rusiyyetü’l-asl Kaytas b. Abdullah nâm gulâm meclis-i şer‘-i hatîr-i lâzımü’t-tevkīrde Mehmed ve zevci Mehmed ve mahzarında üzerlerine da‘vâ edip ben iştirâk-i seviy [24b] üzre mezbûrân Şem‘î ve Mısırlı Mehmed’in abd-i memlûkü olup ikisi ma‘an beni âzâd edip hür olmuş iken mezbûrân rakīk olmak üzre bana vaz‘-ı yed ederler. Suâl olunup kasr-ı yedlerine tenbîh olunmak matlûbumdur dedikde gıbbe’s-suâl mezbûr Mehmed [cevâbında], gulâm-ı mezbûrun nısf-ı şâyi‘ini mûrisesi mezbûre Şem‘î Hâtun’un mülkü olup hâl-i sıhhatinde âzâd eylediğini ikrâr ve mezbûr Mısırlı Mehmed dahi cevâbında zikr olunan gulâm müstakillen abd-i memlûküm olup mezbûru âzâd eylemedim deyip mezbûra vaz‘-ı yedini ikrâr, lâkin mezbûr merkūme Şem‘î ile iştirâk-i seviy üzre mülkü olup mezbûru âzâd eylediğini inkâr eyledikde müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahalle-i mezbûre ahâlîsinden Mehmed b. Ahmed ve Ramazan b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ gulâm-ı mezbûr iştirâk-i seviy üzre müteveffât-ı mezbûre ile mezbûr Mısırlı Mehmed’in abd-i memlûkü olup mezbûrân mezbûr Kaytas’ı her biri huzûrumuzda i‘tâk-ı sahîh-i şer‘î ile i‘tâk ve tahrîr eylediler. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mezbûr Kaytas’dan kasr-ı yedine mezbûr Mısırlı Mehmed’e tenbîh olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Zilka‘deti’ş-şerîfe li sene selâse ve seb‘în ve elf.
Şuhûdü’l-hâl: Hüseyin Beşe b. İlyas, Hüseyin b. Kasım, Taşkın b. Mustafa, Mehmed b. Mustafa, Mehmed b. Sefer, Piyâle b. Abdullah, Abdi Çelebi el-Muhzır, Şükür Bey b. Mustafa el-Muhzır, Mehmed b. Ramazan el-Muhzır, Baba Resûl b. Rıdvan el-Muhzır.
|