|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 272 Hüküm no: 277 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaytas b. Abdullah’ın eski sahibi Mısırlı Mehmed b. Bulut’la alacak davasında sulh olduğu
Sulh Mahmiye-i İstanbul’da Manisalı Çelebi mahallesinde sâkin Kaytas b. Abdullah meclis-i şer‘-i hatîrde mu‘takı râfi‘ü’l-kitâb Mısırlı Mehmed b. Bulut muvâcehesinde ikrâr ve takrîr-i kelâm edip mu‘takım mezbûr Mısırlı Mehmed mukaddemâ beni i‘tâk ettikden sonra mu‘takım mezbûr Mısırlı Mehmed’den ba‘de’l-ıtk kendi malımdan sana benim için bir câriye alıver deyû elli iki kıt‘a riyâlî kebîr guruş vermiş idim. Ol cins câriyemi alıvermemekle meblağ-ı mezbûru da‘vâ ve istirdâd murâd eylediğimde mezbûr Mısırlı Mehmed dahi meblağ-ı mezbûru vech-i muharrer üzre ahzını inkâr etmekle beynimizde nizâ‘ vâki‘ olup beni da‘vâ-yı mezkûreden bin akçe üzerine sulh edip ben dahi sulh-ı mezbûru kabûl ve bedel-i sulh olan meblağ-ı mezbûru yedinden alıp kabz ve husûs-ı mezbûra müte‘allika da‘vâdan zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Zilka‘deti’ş-şerîfe li sene 1073.
Şuhûdü’l-hâl: Şükrullah Çelebi b. Mustafa, Abdi Çelebi b. Hüseyin, Resûl b. Rıdvan, Hacı Yunus b. Musa.
|