Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 94 Hüküm no: 80 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden İsmail Efendi’nin azatlı kölelerinin kendilerine miras kalan odaların kirasını aralarında paylaşmak üzere anlaştıkları Mahmiye-i İstanbul’da Salih Paşa Mahallesi’nde sâkin iken bundan [akdem] vefât eden bezirgânbaşı merhûm İsmail Efendi b. Ebîbekir’in utekāsından bâ‘isûn-ı hâze’l-kitâb Süleyman b. Abdullah ve el-Hâc Dilaver ve el-Hâc Hasan ve Rıdvan ve Hüdaverdi nâm kimesneler ve Raziye bt. Abdullah ve Belkıs ve Afitab ve Müstakim ve Zamane ve Ruhsar nâm hatunlar ve sâirleri meclis-i şer‘-i hatîr-i lâzımü’t-tevkīrde gelip herbiri âharın muvâcehesinde ikrâr ve takrîr-i kelâm edip mu‘takımız müteveffâ-i merkūm İsmail Efendi hâl-i sıhhatinde mahalle-i mezbûrede vâki‘ ma‘lûmü’l-hudûd sekiz bâb mülk odalarını vakf ve habsedip gallesini bize şart etmiş idi. Lâkin biz cümlemiz yirmi üç kimesne olup zikr olunan hucurâtda ancak sekizimiz sâkin olmağla sâirlerimize gadr olduğundan mâ‘adâ münâvebe dahi mümkün olmamağla mârru’z--zikr hucurâtda sâkin olanlarımız mâh be-mâh seksen akçe kirâ verip ol kirâdan hâsıl olan altı yüz kırk akçeyi yine cümlemiz beynimizde ale’s-seviyye iktisâm etmek üzere mukāvele ve ittihâd eyledik. Hâlâ hüccet-i şer‘iyye olunmak iltimâs ederiz deyip mazmûn-ı nutku takrîrlerine muvâfıka vakfiye-i ma‘mûlün-bihâ ibrâz eylediklerinden sonra mukırrûn-ı mezbûrûndan herbiri âharı vicâhen tasdîk ve şifâhen tahkīk etmeğin mâ-vaka‘a kaydolundu. Fi’l-yevmi’s-sâmin aşer şehri Ramazani’l-mübârek li-sene selâse ve sittin ve elf. Şuhûdü’l-hâl: Mehmed Beşe b. Süleyman, Pîrî Beşe b. Hüseyin, İbrahim Çelebi b. Davud, Halil b. İbrahim, Rıdvan b. Abdullah, Ramazan b. Yusuf.