Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 93 Hüküm no: 79 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duka v. Yani’nin kefil olduğu parayı Mayer v. Avraham’a ödemesi gerektiği Mahmiye-i İstanbul’da Alman cemâ‘atinden işbu bâ‘isü’r-rakīm Mayer v. Avraham nâm Yahûdi meclis-i hatîr-i lâzımü’t-tevkīrde Duka v. Yani nâm zimmî muvâcehesinde üzerine da‘vâ edip gāib ani’l-meclis Celasini v. Malkom nâm zimmî zimmetinde yedimden müşterâ ve makbûz kıymet ve mikdârı beynimizde ma‘lûm ibrişim kaytan ve bükme semenlerinden yüz elli guruş hakkım olup meblağ-ı mezbûra yine gāib ani’l-meclis Dimitri v. Yani nâm zimmî tarafından emr ve kabûlü hâviye kefâlet-i sahîha-i şer‘iyye ile kefîl bi’l-mâl olmuş idi. Hâlâ merkūm Dimitri’nin cihet-i kefâletden zimmetinde lâzım gelen yüz elli guruşa merkūm Duka kefîl olmağın kefâleti hasebiyle taleb ederim suâl olunsun dedikde gıbbe’s-suâl merkūm Duka cevâbında müdde‘î-i merkūmun hasmı mezbûr Dimitri’nin nefsine kefîl oldum deyip mâla kefîl olduğunu inkâr edicek müdde‘î-i mezbûr Mayer’den da‘vâsına mutâbık beyyine taleb olundukda Mahrûse-i Galata’da Sultan Bayezid Mahallesi’nde sâkin Hasan v. Pîrî ve mahmiye-i mezbûrede cemâ‘at-i mersûmeden Aslan v. Mayer nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr Mayer’in mezbûr Celasini zimmetinde beynlerinde ma‘lûm ibrişim kaytan ve bükme semenlerinden yüz elli guruşa ...? merkūm Duka bizim huzûrumuzda kefîl bi’l-mâl oldu, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle meblağ-ı merkūmu müdde‘î-i mersûma def‘ ve teslîm etmek üzere merkūm Duka’ya tenbîh olunup mâ-vaka‘a ketb olundu. Fi’r-râbi‘ aşer şehri Ramazani’l-mübârek li-sene selâse ve sittin ve elf. Şuhûdü’l-hâl: Pîrî Beşe b. Hüseyin, Süleyman Beşe b. Mehmed, Rıdvan b. Abdullah, Halil b. Mustafa, Ramazan b. Yusuf.