|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 283 Hüküm no: 296 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
El-Hâc Mehmed Çelebi b. Nurullah’ın Halil Çelebi b. Nasrullah’dan talep ettiği alacak davasında sulh oldukları
Sulh Mahmiye-i İstanbul’da Sofular mahallesi ahâlîsinden olup mahalle-i mezbûrda mescid-i şerîfde müezzin olan el-Hâc Mehmed Çelebi b. Nurullah meclis-i şer‘-i hatîr-i lâzımü’t-tevkīrde Halil Çelebi b. Nasrullah mahzarında ikrâr ve takrîr-i kelâm edip ben mukaddemâ vakf-ı mezbûrun mütevellîsi iken mezbûr Halil Çelebi benden rüşvet def‘a-i ûlâda seksen riyâlî guruş ve def‘a-i sâniyyede bin beş yüz akçe ve sâlisede yirmi riyâlî guruş ve râbi‘ada bin iki yüz akçe almış idi el-hâletü hâzihî meblağ-ı mezbûrun cümlesin mezbûr Halil Çelebi’den da‘vâ eylediğimde mezbûr ba‘zısını ikrâr ve ba‘zısını inkâr eyledikden sonra vesâtat-ı muslihîn ile da‘vâ-yı mezbûreden mezbûr Çelebi benim ile dokuz bin akçe üzerine sulh olup ben dahi meblağ-ı mezbûru kabûl ve bedel-i sulh olan dokuz bin akçeyi mezbûr yedinden alıp kabz edip da‘vâ-yı mezbûreden mezbûr el-Hâc Halil Çelebi’nin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb. Fi’l-yevm 8 min Zilka‘de sene 1073.
Şuhûdü’l-hâl: Mehmed Çavuş b. Halil, Fahrü’l-eimme Mustafa Efendi b. ( ), Fahrü’l-eimme Mustafa Efendi, Mehmed Efendi b. Mahmud Efendi, Mehmed Çelebi.
|