.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 283
Hüküm no: 295
Orijinal metin no: [26a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Mehmed’in boşandığı eşi Mehmed Çelebi b. Mustafa’dan mehr-i müeccel ve nafakasını aldığı

Tatlîk Mahmiye-i İstanbul’da Hoca Hayreddin mahallesinde sâkine Fâtıma bt. Mehmed nâm hâtun meclis-i şer‘-i hatîr-i lâzımü’t-tevkīrde zevc-i mutallıkı hâfızü’l-kitâb Mehmed Çelebi b. Mustafa mahzarında tav‘an ikrâr ve takrîr-i kelâm edip zevcim mezbûr Mehmed Çelebi beni tatlîk etmekle zimmetinde olan üç bin akçe mehr-i müeccelimi ve ber vech-i peşîn beş yüz akçe nafaka-i iddet-i ma‘lûme ve me’ûnet-i süknâmı mezbûr Mehmed Çelebi yedinden alıp kabz edip zevciyyete ve gayra müte‘allika da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-hâdî aşer min Zilka‘deti’ş-şerîfe li sene 1073.


Şuhûdü’l-hâl: İbrahim Çelebi b. Hüseyin, Mustafa b. İbrahim, Solak Mehmed Çelebi b. Mustafa, Mustafa Çelebi b. el-Hâc Hüseyin, Mehmed Çelebi b. Mustafa, Mustafa Halîfe, Abdi Çelebi el-Muhzır.