|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 284 Hüküm no: 298 Orijinal metin no: [26a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Nalband İbrahim b. Mehmed’in atının gözünü çıkardığına iddia eden İbrahim Ağa b. Ali’nin bunu ispat edemediği
Yemîn Mahmiye-i İstanbul’da Davud Paşa mahallesi sâkinlerinden İbrahim Ağa b. Ali nâm kimesne meclis-i şer‘de nalband tâifesinden işbu bâ‘isü’l-kitâb İbrahim b. Mehmed mahzarında üzerine da‘vâ ve takrîr-i kelâm edip târih-i kitâb günü mezbûr İbrahim’in nalband dükkânına bir re’s kır atımı bağlayıp, mezbûr İbrahim zikr olunan atın sağ gözün darb edip çıkarmışdır. Noksan kıymeti olan beş yüz akçeyi taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr İbrahim b. Mehmed müdde‘î-i mezbûrun atını darb edip gözün çıkarmadığına yemîn teklîf olundukda ol dahi hasbe’l-mes’ûl half billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâdî aşer min Zilka‘deti’ş-şerîfe li sene 1073.
Şuhûdü’l-hâl: Abdi Bey b. Hüseyin, el-Hâc Ömer b. Ali, Mustafa b. Hüseyin Abdullah b. Mustafa, Ahmed Çelebi b. Ali.
|