.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 285
Hüküm no: 299
Orijinal metin no: [26b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hümâyûn Hâtun bt. Abdullah’ın Şeyhülislâm Esad Efendi Çeşmesi suyolu tamiri için vakf ettiği guruş

Vakfiye Elhamdü lillâhi’l-meliki’l-müte‘âl el-vâkıfu alâ külli’l-ahvâl ve’s-salâtü ve’s-selâmü alâ nebiyyihî Muhammedi’l-mevsûf bi ehâsini’l-hılâl ve mehâsini’l-hısâl ve alâ âlihî ve ashâbihî hayrü’l-ashâb ve hayrü’l-âl ve ba‘de, işbu kitâb-ı sıhhat nisâbın tahrîrine bâ‘is ü bâdî budur ki medîne-i hazret-i Ebâ Eyyûb Ensârî -radiye anhu Rabbihi’l-Bârî- iskelesi kurbunda sâkine fahrü’l-muhadderât sâhibetü’l-hayrât Hümâyûn Hâtun bt. Abdullah meclis-i şer‘-i şerîf-i lâzımü’t-teşrîfde, vakf-ı âti’z-zikre mütevellî nasb ve ta‘yîn eylediği Hüseyin Çavuş b. Abdullah mahzarında ikrâr ve takrîr-i kelâm edip etyab-ı mâlımdan ve ahsen-i menâlimden niyet-i hâlisa ile yüz esedî guruş ifrâz ve sâir emlâkimden mümtâz edip hasbeten lillâhi te‘âlâ ve taleben li merzâti’r-Rabbi’l-a‘lâ vakf-ı sahîh-i mü’ebbed ve haps-i sarîh-i muhalled ile vakf ve haps edip şöyle şart eyledim ki meblağ-ı mezbûr rehn-i kavî ve kefîl-i melî ile vech-i şer‘î üzre mütevellî yediyle senede onu on bir buçuk hesâbı üzre her sâl istirbâh ve istiğlâl olunup hâsıl olan ribh ve nemâsı mahrûse-i Galata a‘mâlinden kasaba-i Tophâne’ye tâbi‘ Ayas Paşa kurbunda Avni Efendi mahallesinde vâki‘ dâric-i medâric-i rahmetullâhi’s-samed şeyhülislâm Esad Efendi hazretleri binâ eylediği çeşmenin su yolu meremmetine sarf ve harc oluna ve mütevellî-i vakf-ı mezbûr cihet-i tevliyyet için yevmî bir akçe vazîfeye mutasarrıf ola deyû meblağ-ı mezbûru mütevellî-i mersûma teslîm ol dahi vakfiyet üzre kabz ve tesellüm eyledi dedikde gıbbe’t-tasdîk vâkıfe-i merkūme semt-i vifâkdan cânib-i şikāka teveccüh edip vakf-ı mezbûrdan rücû‘ ve ibtâl-i vakf mukaddemâtına şürû‘ eyleyip mütevellî-i mezbûr muvâcehesinde takrîr-i da‘vâ edip vakf-ı nukūd ınde’l-eimmeti’s-selâse bâtıl ve hilye-i sıhhat ve nifâzdan âtıl olup rücû‘ meşrû‘ olmağın rücû‘ eyledim. Meblağ-ı mezbûru istirdâd ederim dedikde mütevellî-i mezbûr dahi cevâbında fi’l-hakīka hâl nesc olunan minvâl üzredir, lâkin hazret-i İmâm Züfer -aleyhi rahmetullâhi’l-ekberden- İmâm Ensârî -aleyhi rahmetü’l-bârî- rivâyeti üzre sahîh ve câiz olup fî zamâninâ vülât ol rivâyet üzre hükme müvellâ oldukları menşûrlarında mastûrdur deyû imtinâ‘ edip işbu tevkī‘-i refî‘i zîver-i kitâb-ı anberîn-nikāb olan Efendi hazretleri huzûrunda müterâfi‘ân ve fasl u hasma tâlibân olduklarında, hâkim-i müşârün-ileyh -esbağallâhu te‘âlâ ni‘amehû aleyh- hazretleri dahi İmâm Züfer kavli üzre vakf-ı nukūdun sıhhatine hükm ettikden sonra, vâkıfe-i mezbûre inân-ı kelâmın semt-i âhara atf edip eğerçi hükm-i mezbûr ile vakf-ı nukūd-ı sıhhat hâsıla oldu. Lâkin İmâm-ı kebîr ve hümâm-ı hatîr Ebû Hanîfe-i Kûfî -cûziye hayrü’l-cezâ ve kûfiye- hazretleri katında sıhhat lüzûmu müstelzim olmayıp rücû‘ meşrû‘ olmağın tekrâr rücû‘ eyledim, meblağ-ı mezbûru mütevellî-i mesfûrdan taleb ederim dedikde mütevellî-i merkūm dahi tekrâr cevâba tesaddî edip eğerçi İmâm-ı A‘zam ve Hümâm-ı efhâm hazretleri katında sıhhat müstelzim olmamağla, vakıfdan rücû‘a miknet ve fesh ve ibtâle kudret var idiği müstağnî ani’l-beyândır. Lâkin İmâmeyn-i hümâmeyn katlarında sıhhat ve lüzûm tev’emân ve mütelâzımân olduğu zâhirdir. Pes re’y-i imâmeyn üzre nukūd-ı mezbûrenin vakfiyetinin lüzûmuna hükm taleb ederim deyicek hâkim-i müşârün-ileyh -lâ-zâle beyne’l-enâm- müşârün-ileyh tenfîz-i vakf tarafını tercîh ve ibkā-i hayrâtı tashîh kasd edip hâlâ amel ve fetvâ dahi imâmeyn-i mezbûreyn kavilleri üzre olmağın âlimen bi’l-hilâf fî mesâ’ili’l-evkāf, nukūd-ı mezbûrenin vakfiyetine hükm etmekle cümle eimme-i dîn -rahmetullâhi te‘âlâ aleyhim ecma‘în- kavilleri üzre vakıf sahîh ve lâzım olup naks ve nakzına mecâl muhâl oldu. Femen beddelehû ba‘demâ semi‘ahû fe-innemâ ismuhû ale’llezîne yübeddilûnehû inna’llâhe semî‘un alîm ve ecrü’l-vâkıfı ale’l-hayyi’l-cevâdi’l-kerîm, cerâ zâlike, ve hurrire fi’l-yevmi’s-sâlis min Zilka‘deti’ş-şerîfe li sene selâse ve seb‘în ve elf.


Şuhûdü’l-hâl: Mefharü’l-ulemâ’i’l-kirâm Ahmed Efendi b. el-merhûm şeyhülislâm Ebûsaid Efendi, Efdalü’l-ulemâ’i’l-izâm Feyzullah Efendi b. el-merhûm şeyhülislâm Ebûsaid Efendi, İshak Efendi, Mustafa Efendi b. Hüseyin el-İmâm, Halil Çelebi, Ali Efendi b. Mehmed el-İmâm, İbrahim Ağa, Abdülmümin b. Hasan, İbrahim Bey b. Abdullah, Süleyman b. Abdullah, Ali Çelebi b. Mustafa, Süleyman Beşe b. Abdullah.