İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 510 Hüküm no: 643 Orijinal metin no: [57b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bahçevanların aleyhine açtıkları davadan vazgeçmeleri üzerine Mustafa Beşe b. Abdullah’ın da kethüdâlıktan rızasıyla ayrıldığı Bahçevânlar Mahmiye-i İstanbul’da Yedikule ve Büyük ve Küçük Langalar’da ve mahrûse-i Galata ve Üsküdar’da vâki‘ bostanların bostancıları kethüdâsı Mahmud Ağa b. Abdurrahim ve bostancılar tâifesinden Mustafa Beşe b. Mehmed ve Ali b. Mustafa ve Mehmed Çelebi b. Mehmed ve Mehmed b. Hasan ve Malkoç Beşe b. Abdullah ve Mehmed b. Abdullah ve Hüseyin b. Abdülmennân ve Mehmed Beşe ve Ahmed b. Mehmed nâm kimesneler ve zimmîlerden dahi Yuvan ve Pireşkova ve Kösec Yorgi ve Dimo ve Yanko ve Minho ve sâirleri meclis-i şer‘-i şerîf-i şâmihu’l-imâdda sâbıkan kethüdâları olan Mustafa Beşe b. Abdullah muvâcehesinde her biri ikrâr ve takrîr-i kelâm edip merkūm Mustafa Beşe mukaddemâ bize kethüdâ olundukda kefîlnâme nâmına bizden altı bin akçemiz alıp meblağ-ı mezbûru da‘vâ etmiş idik hâlâ fâriğler olup zikr olunan meblağa müte‘allika da‘vâdan ve târih-i kitâba gelince beynimizde vâkı‘a hukūk-ı ma‘lûme ve mechûle da‘vâsından mezbûr Mustafa Beşe’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dediklerinde, gıbbe’t-tasdîki’ş-şer‘î mezbûr Mustafa Beşe dahi meclis-i mezbûrda merkūmun bostancılar muvâcehelerinde takrîr-i kelâm edip ben mukaddemâ mezbûrûnun kethüdâlığı hizmetin alıp üzerlerine kethüdâları olup ba‘zı umûrlarına müdâhale etmiş idim. Fîmâ-ba‘d mezbûrun bostancılara kethüdâ olmamağa ta‘ahhüd eyledim dedikde vâki‘ü’l-hâl gıbbe’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharrem li sene 1074. Şuhûdü’l-hâl: Hüseyin Beşe b. Mehmed el-Mübâşir, Süleyman b. Abdullah, el-Hâc Ahmed b. Mahmud, Hüseyin b. Mehmed, Abdi Çelebi b. Mehmed, Küçükzâde Mustafa Çelebi, Ahmed Beşe b. Mehmed.