İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 511 Hüküm no: 644 Orijinal metin no: [57b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Emirhan v. Haçador’un arsasını karısı Sultana bt. Abraham ile oğlu Bedros’a sattığı Mülknâme-i arsa Mahmiye-i İstanbul’da Şeyh Ferhad mahallesinde sâkin Emirhan v. Haçador nâm Ermeni meclis-i şer‘-i hatîrde kendi tarafından asâleten ve menkûhası Sultana bt. Abraham nâm nasrâniyye tarafından husûs-ı âtîye vekîl olan sulbî kebîr oğlu Bedros nâm Ermeni muvâcehesinde ikrâr edip mahalle-i merkūmede vâki‘ bir tarafı Nörsiz v. Devlet nâm Ermeni ve bir tarafı Nazar v. Yani ve bir tarafı İbrahim Çelebi mülklerine ve bir tarafı tarîk-i âma müntehî tûlen ve arzen iki yüz yirmi zirâ‘ mülk arsa-i hâliyemi, iki yüz esedî guruşa ale’l-iştirâk mezbûrâna bey‘ ve teslîm anlar dahi vech-i muharrer üzre iştirâ ve tesellüm eylediklerinden sonra semeni olan iki yüz esedî guruşun yüz elli guruş yedlerinden tamâmen alıp kabz edip elli esedî guruşdan zimmetlerini ibrâ ve iskāt eyledim min ba‘d arsa-i mezbûre mezbûrânın iştirâk-i seviy üzre mülkleridir dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn mine’l-Muharrem li sene 1074. Şuhûdü’l-hâl: Ahmed Çelebi b. Mahmud, Osman b. Ahmed, Veli b. Mahmud, Abdurrahman Efendi el-İmâm, Şükür Bey el-Muhzır, Mehmed Halîfe b. Durmuş el-Müezzin, Abdi Çelebi el-Muhzır, İbrahim Çelebi b. Pervâne, Sinan Kethüdâ b. [v.] Yakob, Odabaşıoğlu Ovanes v. Nikolaki, Agop v. Bağdasar, Gazar v. Teodos.