İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 512 Hüküm no: 646 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hacı Mahmud’un arsasına Nasır oğulları Hacı Nasreddin ve Hacı İsmail’in haksız yere müdahalelerinin yasaklanması İsbât-ı şirâ Mahmiye-i İstanbul’da Dâye Hâtun mahallesi sükkânından Fâtıma Hâtun bt. el-Hâc Mahmud meclis-i şer‘-i hatîrde zikri âtî arsaya vaz‘-ı yedi sâbit olan el-Hâc Nasreddin b. Nasır ve karındaşı el-Hâc İsmail b. Nasır muvâcehelerinde da‘vâ edip mahalle-i mezbûrede vâki‘ bir tarafdan ba‘zan yemişçi Hasan Paşa vakfı ve ba‘zan müezzine meşrût vakıf menzil ve ba‘zan Çivizâde merhûm vakfı ve bir tarafdan Şahhuban vakfı ve ba‘zan tarîk-i hâs ile mahdûd bir mahzen ve su kuyusunu müştemile arsa-i mezbûreyi, târih-i kitâbdan iki sene mukaddem babam mezbûr el-Hâc Mahmud bana yedi yüz otuz kıt‘a riyâlî guruşa bana bey‘ ve teslîm edip ben dahi iştirâ ve kabûl edip mülk-i müşterâm olmuş iken, mezbûrân el-Hâc Nasreddin ve karındaşı vaz‘-ı yed etmişlerdir, suâl olunup kasr-ı yed ettirilmek matlûbumdur dedikde gıbbe’s-suâl mezbûrân el-Hâc Nasreddin ve karındaşı merkūm cevâblarında, arsa-i mezbûreyi müdde‘iyye-i mezbûrenin babası merkūm el-Hâc Mahmud târih-i kitâbdan dört ay mukaddem beş yüz esedî guruşa bize bey‘ ve teslîm biz dahi iştirâk üzre iştirâ ve tesellüm ve def‘-i semen eyledik ana binâ’en vaz‘-ı yed ederiz, müdde‘iyye-i mezbûre arsa-i mezbûreyi târih-i kitâbdan iki sene mukaddem vech-i muharrer üzre babası mezbûr el-Hâc Mahmud yedi yüz otuz guruşa bey‘ ve teslîm edip ol dahi iştirâ ve kabûl ettiğini inkâr ettiklerinde, müdde‘iyye-i mezbûre Fâtıma’dan müdde‘âsını mübeyyene beyyine taleb olundukda kasaba-i Tophâne sükkânından es-Seyyid Mehmed b. es-Seyyid Mustafa ve el-Hâc Piyâle b. Abdullah ve Kaytas b. Abdullah nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ arsa-i mahdûde-i mezbûre merkūm el-Hâc Mahmud kızı işbu müdde‘iyye-i mezbûre Fâtıma’ya târih-i kitâbdan iki sene mukaddem yedi yüz otuz riyâlî guruşa huzûrumuzda bey‘ ve teslîm edip mezbûr dahi iştirâ ve tesellüm edip arsa-i mezbûre, mülküdür. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle arsa-i mezbûreden kasr-ı yede mezbûrlara tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene selâse ve seb‘în ve elf. Şuhûdü’l-hâl: Şaban Çavuş b. İbrahim el-Mübâşir, Ali Beşe Çukadar, Mustafa b. Halil, Abdi Çelebi b. Hüseyin, el-Hâc Ahmed b. Mahmud.