İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 514 Hüküm no: 648 Orijinal metin no: [58a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ali’nin vârislerinden kocası Hasan Odabaşı b. Hızır’ın miras hususunda Pîr Mehmed Çelebi b. Mustafa’nın zimmetini ibrâ ettiği İbrâ Mahmiye-i İstanbul’da Abdi Subaşı mahallesi sâkinelerinden olup vefât eden Ayşe Hâtun bt. Ali’nin verâseti, zevci Hasan Odabaşı b. Hızır ile sadrî kebîr oğlu râfi‘ü’l-kitâb Pîr Mehmed Çelebi b. Mustafa’ya münhasıra olduğu şer‘an zâhir oldukdan sonra merkūm Hasan Odabaşı meclis-i şer‘-i hatîrde mezbûr Pîr Mehmed Çelebi muvâcehesinde ikrâr ve i‘tirâf edip zevcem müteveffât-ı mezbûre Ayşe’nin akār ve menkūl ve arûz ve esâs-ı beyt ve evânî-i nühâsiyye ve gayr-ı nühâsiyye ve bi’l-cümle kalîl ü kesîr terekesinden ve beş bin akçe mehr-i müeccelinden ve sâir ism-i mal ıtlâk olunup cemî‘ terekesinden bi hasebi’l-irsi’ş-şer‘î bana intikāl eden rub‘ hisse-i ma‘lûmemi merkūm Pîr Mehmed Çelebi yedinden tamâmen alıp kabz eyledim min ba‘d zevce-i mezbûre Ayşe’nin terekesinden bir akçe ve bir habbe hak ve alâka kalmadı ve tereke-i mezbûreye müte‘allika mezbûr Pîr Mehmed Çelebi üzerine vechen mine’l-vücûh ve sebebin mine’l-esbâb da‘vâ ve nizâ‘ ve husûmetim dahi yoktur dedikde gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharrem li sene 1074. Şuhûdü’l-hâl: Umdetü’l-mevâliyyü’l-kirâm Ahmed Efendi, Ahmed Çelebi b. Mehmed el-İmâm, Abdullah Efendi b. İbrahim el-İmâm, Mehmed Çelebi Odabaşı, Hasan Çelebi b. Mustafa, odabaşı el-Hâc Derviş, Abdi Beşe b. Nurullah, Mustafa b. Kalender, Halil Çelebi b. Ahmed, Bayram Beşe b. Mehmed, Hasan Halîfe el-Müezzin.