İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 522 Hüküm no: 662 Orijinal metin no: [59a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah’ın menzilini Hacı Hüseyin Ağa’ya sattığı Mülknâme Mahmiye-i İstanbul’da Hâfız Mustafa Çelebi mahallesi ahâlîsinden Mustafa Beşe b. Abdullah nâm râcil meclis-i şer‘-i hatîr-i lâzımü’t-tevkīrde bâ‘isü’l-kitâb el-Hâc Hüseyin Ağa mahzarında tav‘an ikrâr-ı tâm ve takrîr-i kelâm edip mahalle-i merkūmede vâki‘ bir cânibi Mustafa Efendi mülküne ve bir cânibi ba‘zan Hümâ Hâtun ve ba‘zan Hüseyin Çelebi mülküne ve bir cânibi İsmihan Hâtun mülküne ve bir cânibi tarîk-i âma müntehî iki bâb fevkānî oda ile iki bâb tahtânî odayı ve iki sofa ve iki ahır ve tahtadan bir sofa ve kenîf ve bi’r-i mâyı müştemil mülk menzilimi, tevâbi‘ ve levâhıkı ile altı yüz esedî guruşa mezbûr el-Hâc Hüseyin Ağa’ya cânibeynden îcâb ve kabûlü hâvî bey‘-i bât ile bey‘ ü teslîm mezbûr dahi minvâl-i muharrer üzre iştirâ ve tesellüm eyledikden sonra semeni olan altı yüz esedî guruşu mezbûr Hacı Hüseyin Ağa yedinden bi’t-tamâm alıp kabz eyledim min ba‘d menzil-i mezbûr müşterî-i merkūmun mülkü olup keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharrem li sene erba‘a ve seb‘în ve elf. Şuhûdü’l-hâl: Mahmud Efendi b. Hasan el-İmâm, Defterhâne Kâtibi Mehmed Efendi, kuyumcu Solak Ali Beşe, Berber Osman Beşe, Şeyh Ali Efendi, Yusuf Beşe b. Abdullah, Ahmed Çelebi b. Muslu, Ahmed Çelebi b. Mahmud kethüdâ-yı muhzırân.