İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 521 Hüküm no: 661 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sava v. Gorgil’in miras hususunda Nikola v. Yorgi ile sulh olduğu Sulh Medîne-i Galata’ya tâbi‘ kasaba-i Beşiktaş müzâfâtından Arnavud köyü’nde sâkin iken hâlik olan Todori v. Kostantin nâm zimmînin verâseti, zevce-i metrûkesi Kımara bt. Şelemliye nâm nasrâniyyeye ve sulbiye kebîre kızı Semira nâm nasrâniyye ile li ebeveyn karındaşları Yorgi ve Gorgil nâm zimmîlere münhasıra [olup], kable’l-kısme mezbûre Gorgil hâlik olup verâseti sulbî oğulları Sava ve Dimitri nâm zimmîlere münhasıra ve tashîh-i mes’elesi bi tarîki’l-münâsaha otuz iki sehimden olup dört sehimi zevcesi mezbûreye ve on altı sehimi kızı merkūmeye ve altı sehimi li ebeveyn karındaşı mezbûr Yorgi’ye ve üçer sehimi oğulları mezbûrâna isâbet eylediği zâhir ve mezbûr Dimitri dahi fevt olup üç sehim hissesi li ebeveyn karındaşı mezbûr Sava’ya intikāl eyledikden sonra mezbûre Sava meclis-i şer‘de zikri âtî mülk menzile vâzı‘u’l-yed olduğu sâbit olan Nikola v. Yorgi muvâcehesinde tav‘an ikrâr edip ammim hâlik olan Todori’nin terekesinden olup vech-i meşrûh üzre veresesine intikāl edip lede’l-ahâlî ma‘lûmü’l-hudûd menzilden merkūmetân Kımara ve Semira hisse-i merkūmelerini asâleten ve mezbûr Yorgi dahi kendi hisse-i merkūmesini asâleten ve benim ile mezbûr Dimitri’nin hisse-i merkūmelerimizi vasî olmağla vesâyeten merkūm Nikola zimmîye bilâ-menû‘u’ş-şer‘ bey‘ eylediklerinden sonra bizim hissemizde bey‘i câiz olmamağla, ba‘de helâkihî sagīr-i mezbûr Dimitri’nin hisse-i merkūmesi irsen bana intikāl etmekle mezbûr Nikola’dan da‘vâ eylediğimde mezbûr dahi bey‘-i mezbûr düyûn-ı müsbetesi için bey‘ olunduğu isbât sadedinde iken mezbûr Nikola ile da‘vâ-yı merkūmeden bin akçe üzerine sulh olduğumda, ol dahi sulh-ı mezbûru kabûl ve bedel-i sulh olan bin akçeyi mezbûr Nikola yedinden alıp kabz edip da‘vâ-yı merkūmeden zimmetini ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Es-Seyyid Ahmed Çelebi b. es-Seyyid Mustafa el-Mübâşir, Şaban Beşe b. Hüseyin, çukadar Ali Beşe, Ahmed b. Abdullah.