İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 524 Hüküm no: 666 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Semerci Murad v. Gazar’ın Ermeni eski patriği Gazar v. Agop’ta alacağı olduğu İsbât-ı deyn Mahmiye-i İstanbul’da Kefeli mahallesinde sâkine Semerci Murad v. Gazar nâm Ermeni meclis-i şer‘-i hatîrde sâbıkan Ermeni patriği olan Gazar v. Agop muvâcehesinde üzerine da‘vâ edip mezbûr Gazar Ermeni mukaddemâ Ermeni tâifesine bin yetmiş senesinde patrik oldukda sene-i mezbûre Ramazânı’nda benden bin altı yüz riyâlî guruş iktirâz ve kabz eyledikden sonra hattâ benden bin altı yüz riyâlî guruş iktirâz ve kabz eylediğini Meryem Ana kilisesinde ikrâr dahi etmiş idi el-hâletü hâzihî meblağ-ı mezbûr bin altı yüz riyâlî guruşu mezbûr Gazar Ermeni’den taleb ederim, suâl olunsun dedikde gıbbe’s-suâl ve’l-inkâr ve akībe’l-istişhâd mahmiye-i merkūmede el-Hâc İsâ mahallesinde sâkin Haçador v. Serkis ve Mercan çarşısında ekmekçi dükkânında sâkin Magsit v. Andriyas nâm Ermeniler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ mezbûr Gazar zikr olunan Meyrem Ana kilisesinde şehr-i mezbûrda müdde‘î-i mezbûr Semerci Murad Ermeni’den bin altı yüz riyâlî guruş iktirâz ve kabz eyledim, hâlâ zimmetimde vâcibü’l-edâ deynimdir deyû huzûrumuzda tav‘an ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın meblağ-ı mezbûr bin altı yüz riyâlî guruşu müdde‘î-i mezbûr Semerci Murad’a edâya mezbûr Gazar Ermeni’ye tenbîh birle mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharrem li sene 1074. Şuhûdü’l-hâl: İsmail Ağa b. Osman el-Mübâşir, Keşfî Mustafa Efendi el-Kâtib, Müzekkî Mehmed Efendi b. Mustafa el-Kâtib, çukadar Ali Beşe, İbrahim Paşa karındaşı İsmail Ağa, Hüseyin Efendi el-Brusî kâtibü’l-vesîka, Ahmed Çelebi b. Mahmud kethüdâ-yı muhzırân, Abdi Çelebi b. Hüseyin, Şükür Bey b. Mustafa, Mehmed Çelebi b. Abdullah, Mehmed b. Ramazan.