İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 529 Hüküm no: 674 Orijinal metin no: [60a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanya kazasına bağlı Kiraso köyünden Saro v. Todor’un Parmakkapı’da ölen Toma v. Todori’nin vârislerinden olduğu İsbât-ı verâset Fi’l-asl vilâyet-i Rumeli’nde Yanya kazâsı kurâsından Kiraso nâm karye ahâlîsinden hâmilü’l-kitâb Saro v. Todor nâm nasrânî meclis-i şer‘-i hatîr-i lâzımü’t-tevkīrde mahmiye-i İstanbul’da Parmakkapı kurbunda sâkin iken hâlik olan Toma v. Todori nâm zimmînin zevce-i metrûkesi olup terekesine vâzı‘atü’l-yed olan Anarva bt. Yakomi nâm nasrâniyye muvâcehesinde üzerine da‘vâ edip mezbûr Toma hâlik oldukda verâseti zevcesi mezbûreye ve sulbiye kızı Kokona nâm sagīreye ve ben li ebeveyn karındaşı olup babamız mezbûr Todori ve anamız ismi Despo bt. ( ) nâm nasrâniyye olmağla bana münhasıra ve kable’l-kısme sagīre-i mezbûre dahi fevt olup verâseti vâlidesi mezbûre ile li ebeveyn ammi olmağla bana münhasıra ve tashîh mes’elesi yirmi dört sehimden olup yedi sehimi mezbûr Anarva’ya ve on yedi sehimi bana isâbet etmekle terekelerine vâzı‘atü’l-yed olan mezbûre Anarva’dan taleb ederim suâl olunsun dedikde gıbbe’s-suâl mezbûre dahi cevâbında tereke-i müteveffiyân-ı merkūmâna vaz‘-ı yedini ikrâr lâkin mezbûr vech-i muharrer üzre verâsetini inkâr eyledikde mezbûr Saro’dan müdde‘âsı için beyyine taleb olundukda zimmîyândan Kumkapı’da sâkin Lukova v. Vaso ve Tahtaminâre mahallesinde sâkin Kosta v. Dov nâm zimmîler li ecli’ş-şehâde meclis-i şer‘a hâzırân olup istişhâd olundukda fi’l-vâki‘ müdde‘î-i mezbûr Saro zimmî hâlik-i mezbûr Toma’nın li ebeveyn karındaşı olup babaları mezbûr Todori ve anaları Despo bt. ( ) nâm nasrâniyyedir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm bi tarîki’l-münâsaha on yedi sehim husûsunu müdde‘î-i mezbûr Saro zimmîye [edâya] mezbûre Anarva’ya ba‘de’t-tenbîh mâ vaka‘a bi’t-taleb ketb olundu. [Fî yevmî gurreti Saferi’l-hayr] li sene erba‘a ve seb‘în ve elf. Şuhûdü’l-hâl: Mehmed Çavuş el-Mübâşir, Ahmed Çelebi b. Mahmud, Keşfî Mustafa Efendi el-Kâtib, Abdi Çelebi, Şükür Bey.