İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 528 Hüküm no: 673 Orijinal metin no: [60a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kürekçi Mehmed b. Abdullah’ın Bozacı Panbuk v. İsteryo aleyhine açtığı alacak davasında haksız olduğu Men‘ Kürekçi tâifesinden Mehmed b. Abdullah meclis-i şer‘de bozacı tâifesinden Panbuk v. İsteryo nâm zimmî muvâcehesinde üzerine da‘vâ ve takrîr-i kelâm edip bozacı tâifesine kürekçi fermân olundukda mezbûr Panbuk beni kürekçi ameli için beş bin akçe ücret üzerine istîcâr edip ben dahi edâ-i hizmet eylediğimden sonra ücret-i mezbûrem olan beş bin akçe zimmetinde kalmışdır, suâl olunsun dedikde gıbbe’s-suâl merkūm Panbuk cevâbında ben mezbûru istîcâr eylemedim. Müdde‘î-i mezbûr mukaddemâ işbu hâzır bi’l-meclis Mehmed nâm kimesneden vech-i muharrer üzre beni sen beş bin akçe üzerine istîcâr eyledin deyû hâlâ benden da‘vâ eylediği ücreti, mezbûr Mehmed’den da‘vâ edip iki bin akçe üzerine mezbûr Mehmed ile sulh olmuş idi deyicek gıbbe’l-istintâk ücret-i mezkûreyi mezbûr Mehmed’den da‘vâ edip iki bin akçe üzerine mezbûr Mehmed ile sulh olduğunu mezbûr ikrâr ve i‘tirâf etmekle merkūm Panbuk’dan da‘vâsı sahîha olmamağın müdde‘î-i mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Fî gurreti Saferi’l-hayr li sene 1074. Şuhûdü’l-hâl: Şükür Beşe b. Mustafa, Abdi Çelebi b. Hüseyin, Mehmed Çelebi b. Abdullah, el-Hâc Yusuf b. Musa, Mehmed b. Ramazan, Baba Resûl.