İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 532 Hüküm no: 679 Orijinal metin no: [60b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Abdi’nin karısı tarafından rehin karşılığında Yako’ya verilen borçta alakasının olmadığı Mahmiye-i İstanbul’da Edirnekapısı kurbunda Ali Paşa-yı Atîk mahallesi sâkinlerinden Mehmed Çelebi b. Abdi meclis-i şer‘-i hatîrde bâ‘isetü’l-kitâb zevcesi Belkıs bt. Gülâbî nâm hâtun tarafından tasdîk-ı âti’l-beyâna vekîl olup bi mâ hüve tarîki’s-sübût şer‘an vekâleti sâbite olan Eyüb Çelebi b. Süleyman muvâcehesinde bi’t-tav‘ ikrâr ve takrîr-i kelâm edip Yako nâm zimmî mukaddemâ zevcem mezbûreden istikrâz ve kabz eylediği üç yüz otuz guruş mezbûr zimmîye benim yedimle teslîm olunmuş idi. Meblağ-ı mezbûr üç yüz otuz guruş zevcem mezbûre Belkıs’ındır, benim alâkam yoktur meblağ-ı mezbûr mukābelesinde olan rihânı dahi mezbûre Belkıs yedindedir dedikde mezbûrun cemî‘ kelimâtını vekîl-i mezbûr tahkīk ve tasdîk etmeğin mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene 1074. Şuhûdü’l-hâl: Es-Sâbikūn.