İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 532 Hüküm no: 680 Orijinal metin no: [60b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdi’nin bahçe hissesini karısı Belkıs bt. Gülâbi’ye hibe ettiği Hibe Mahmiye-i İstanbul’da Edirnekapısı kurbunda Ali Paşa-yı Atîk mahallesi sükkânından Mehmed Beşe b. Abdi meclis-i şer‘-i hatîr-i lâzımü’t-tevkīrde zevcesi Belkıs Hâtun bt. Gülâbî tarafından tasdîk-ı âti’l-beyâna vekîl olup bi mâ hüve tarîki’s-sübût şer‘an vekâleti sâbite olan Eyüb Çelebi b. Süleyman muvâcehesinde ikrâr ve i‘tirâf edip mahalle-i mezbûrede sâkin olduğum menzilim kurbunda vâki‘ eşcâr-ı müsmire ve gayr-ı müsmireyi müştemil olup bir tarafı pazarcı dükkânı ve bir tarafı ba‘zan yahudihâne ve ba‘zan müezzin ( ) Halîfe mülkü ve bir tarafı ba‘zan el-Hâc Hüseyin ve ba‘zan kendim sâkin olduğum menzilimin havlusu ve bir tarafı Hatîce Sultan hamamı külhanı ile mahdûd olan bahçemin yahudihâne tarafında vâki‘ nısfını, alâmet-ı fâsıla vaz‘ olunup ifrâz ve ta‘yîn olundukdan sonra zevcem merkūme Belkıs’a Hibe-i sahîha ile hibe ve temlîk edip ol dahi ittihâb ve temellük ve kabûl eyledi. Fîmâ-ba‘d zikr olunan bahçenin nısf-ı mu‘ayyeni mezbûre Belkıs’ın mülk-i mevhûbudur keyfe mâ yeşâ’ mutasarrıfe olsun dedikde gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene 1074.