İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 533 Hüküm no: 681 Orijinal metin no: [60b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi’nin malının üçte birini vasiyet edip Eyüb Çelebi’ye de vasî tayin ettiği Vasiyyet Mahmiye-i İstanbul’da Edirnekapısı kurbunda Ali Paşa-yı Atîk mahallesinde sâkin Mehmed Çelebi b. ( ) meclis-i şer‘-i şerîf-i şâmihu’l-imâdda takrîr-i kelâm ve bast-ı merâm edip işbu dâr-ı fenâ bî-sebât ve bî-bekā olup na‘îmi zıll-ı zâil ve mukīmi dayf-ı râhil olmağla âlem-i fenâ ve şuhûddan menzil-i bekā ve hulûda? rıhlet etmezden mukaddem ba‘zı sadakāt-ı mebrûre inşâsına niyet ve muzâfen ilâ mâ yü‘addü’l-mevt şöyle vasiyyet eyledim ki bi emrillâhi’l-meliki’l-müte‘âl fevt olduğumda malımın sülüsünden yüz on beş riyâlî guruş ifrâz olunup techîz ve tekfînime ve levâzım-ı defnime ve yevm-i vefâtımda ve sâir eyyâm-ı mu‘tâdede tabh olunacak ta‘âma harc u sarf olunup fukarâya it‘âm oluna deyû vasiyyet ve bu vasiyyetimi tenfîz için işbu Eyüb Çelebi’yi vasiyy-i muhtâr nasb ve ihtiyâr eyledim dedikde mezbûr Eyüb Çelebi dahi vesâyet-i mezbûreyi kabûl ve hizmet-i lâzımesin edâya ta‘ahhüd etmeğin mâ vaka‘a gıbbe’t-taleb ketb olundu. Fi’l-yevmi’s-sânî min Saferi’l-hayr li sene erba‘a ve seb‘în ve elf. Şuhûdü’l-hâl: Es-Sâbikūn.