İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 534 Hüküm no: 684 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Halil’in yarım menzil hissesini kocası Ahmed b. Ali’ye sattığı Mülknâme Mahmiye-i İstanbul’da Tercüman Yunus mahallesi sâkinelerinden Fâtıma bt. Halil nâm hâtun meclis-i şer‘-i hatîrde zevci Ahmed b. Ali muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafı Ali Bey vakfı ve bir tarafı Sâliha bt. Ahmed nâm hâtun mülkü ve bir tarafı Hasan Ağa bahçesi ve bir tarafı tarîk-i âm ile mahdûd tahtânî iki beyti ve cüneyneyi ve kenîfi hâvî mülk menzilimin nısf-ı şâyi‘i benim ve nısf-ı âharı zevcim mezbûrun müşterek mülkümüz olup hâlâ benim menzil-i mezbûrda olan nısf hisse-i şâyi‘amı zevcim mezbûr Ahmed’e bey‘-i bât ile üç bin yedi yüz elli akçeye bey‘ ü teslîm eyleyip ol dahi iştirâ ve kabûl ettikden sonra meblağ-ı mezbûr üç bin yedi yüz elli akçeyi yedinden tamâmen alıp kabz eyledim ba‘de’l-yevm menzil-i mezbûrun mecmû‘u zevcim mezbûr Ahmed’in mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Saferi’l-hayr li sene erba‘a ve seb‘în ve elf. Şuhûdü’l-hâl: Baba Resûl b. Rıdvan el-Muhzır, Şükür Beşe b. Mustafa el-Muhzır, Mehmed b. Ramazan, el-Hâc Yusuf b. Musa, Abdülfettah Efendi el-İmâm, Abdullah Efendi b. Şaban, el-Hâc Ramazan b. Mustafa, Mehmed b. Abdullah, Bozacı Mustafa, Keçeci Tatar, Ramazan b. Mustafa.