İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 537 Hüküm no: 689 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tahtaminâre mahallesinde ölmüş olan Yamandi v. Yorgi’ye ait evin Todorişka’ya satıldığı Mülknâme Mahmiye-i İstanbul’da Tahtaminâre mahallesinde sâkin olup Eflak’da medyûnen hâlik Yamandi v. Yorgi nâm zimmînin verâseti, zevce-i metrûkesi Ezmerağda bt. Toka? nâm nasrâniyyeye ve sulbî kebîr oğulları İstaki ve gāibân ani’l-meclis Dimitraşkar ve Kostantin nâm zimmîler ve sagīr oğulları Peraşkar v. Yanaki’ye ve sulbiye kebîre kızı Zafire nâm nasrâniyyeye münhasıra oldukdan sonra, mezbûr İstaki asâleten ve mezbûre Ezmarağda kendi tarafından asâleten ve sagīrân-ı mezbûrânın tesviye-i umûru için mansûbe vasîleri olmağla vesâyeten ve gāibân-ı mezbûrân ile mezbûre Zafire’nin taraflarından husûs-ı âtîye vekîl olup Yorgi v. Yanboli ve Arandriye v. Manol ve Bakır v. Nifer nâm zimmîler şehâdetleri ile vekâleti sâbite olmağla vekâleten meclis-i şer‘-i hatîr-i lâzımü’t-tevkīrde Todorişka v. Esterezon nâm zimmî tarafından husûs-ı âti’z-zikre vekîl olup Papa Yorgi v. Yano ve Kostantin v. Toma nâm zimmîler şehâdetleri ile vekâleti sâbite olan Yorgaki v. Dimitraşkar nâm zimmî mahzarında tav‘an ikrâr ve takrîr-i kelâm edip mezbûr zimmî medyûnen hâlik oldukda tereke makūlesinde ancak mahalle-i merkūmede vâki‘ bir tarafı Kostantin zimmî mülkü ve bir tarafı ba‘zan Eflak sarayı ve ba‘zan Eşekçi Kanber mülkü ve bir tarafı tarîk-i hâs ve bir tarafı tarîk-i âm ile mahdûd ve mümtâz ve üç bâb fevkānî odayı ve iki sofayı ve matbah ve kileri ve kenîfi ve tahtânî bir bâb oda ve mahzen ve ahırı ve bahçeyi hâvî olan mülk menzili düyûn-ı müsbeti için sûk-ı sultânîde kirâren müzâyede olundukda iki bin iki yüz yirmi beş esedî guruşa müvekkil-i mezbûr Todorişka üzerinde karâr edip bir akçe ziyâde ile tâlib-i âhar bulunmamağın meblağ-ı mezbûr iki bin iki yüz yirmi beş esedî guruşa vekîl-i mezbûr Yorgaki’ye asâleten ve vesâyeten ve vekâleten bey‘ ve teslîm eylediğimizde, ol dahi minvâl-i muharrer üzre vekâleten iştirâ ve tesellüm eyledikden sonra semeni olan meblağ-ı mezbûru vekîl-i mezbûr Yorgaki yedinden bi’t-tamâm alıp kabz eyledik. Min ba‘d menzil-i mezbûr Todorişka’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dediklerinde, gıbbe’t-tasdîki’l-mu‘teber mâ vaka‘a bi’t-taleb ketb olundu. Fî gurreti Saferi’l-hayr li sene 1074. Şuhûdü’l-hâl: Ahmed Efendi b. Abdurrahman el-Müezzin, Hasan Efendi b. Mustafa el-Müezzin, Abdülkādir Efendi b. Yusuf el-Müezzin, Mehmed Çelebi b. Muslu el-Müezzin, Mustafa Efendi b. Mehmed el-İmâm, İmâmzâde Abdullah Çelebi, Mustafa Çelebi b. Abdullah, Bayram b. Abdullah, Hüseyin Çelebi b. Mehmed el-Hammâmî, Mehmed Çelebi b. Ahmed er-Râcil, Abdi Çelebi, Şükür Bey, Mehmed b. Himmet, Papa Yorgi v. Yano, Papayimto? v. Yano, Polidre v. Yani, Anastas v. Nikola, Andron v. ( ), Yorgi v. Niyo?.