Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 95 Hüküm no: 84 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un evini Emine Hatun’a sattığı Mahmiye-i İstanbul’da Zeyrek Mahallesi’nde sâkine fahrü’l-muhadderât Râbia Hatun bt. el-Hâc Mehmed tarafından husûs-ı âti’z-zikre Ahmed Efendi b. Himmet ve Şeyh Mehmed Efendi b. Musa Efendi şehâdetleriyle vekâleti sâbite olan fahrü’l-kuzât Mustafa Efendi b. el-Hâc Abdülkerim meclis-i şer‘-i hatîr-i lâzımü’t-tevkīrde Emine Hatun bt. Abdullah tarafından tasdîka vekîl olan Musa Efendi b. el-Hâc Mehmed mahzarında bi’l-vekâle ikrâr-ı tâm ve takrîr-i kelâm edip mahmiye-i mezbûrda Soğukkuyu Mahallesi’nde vâki‘ bir tarafı Ketenci el-Hâc Mehmed b. Abdullah mülkü ve bir tarafı merkūme Râbia Hatun mülkü ve yine bir tarafı mersûme Râbia Hatun’un mülk arsa-yı hâliyesi ve bir tarafı tarîk-i âm ile mahdûd bir bâb tahtânî odayı ve sofayı ve eşcâr-ı müsmire ve gayr-ı müsmire muhavvatayı ve kenîfi müştemil arsasının İsmail Ağa Vakfı’na senevî yirmi akçe mukāta‘ası olan mülk menzilini mezbûre Emine Hatun’a yirmi beş bin beş yüz akçeye bâtten bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr yirmi beş bin beş yüz akçeyi müvekkilem mezbûre Râbia Hatun mezbûre Emine Hatun yedinden tamamen ahz u kabz eyledi. Zikr olunan menzil müvekkilim mezbûre Emine Hatun’un mülk-i müşterâsı olmuşdur, keyfe mâ yeşâ’ ve yehtâr mutasarrıfe olsun dedikde mukırr-ı mezbûr Mustafa Efendi vekâleten hâvî olan ikrârında vekîl-i âhar merkūm Musa Efendi vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-şehri Ramazani’l-mübârek li-sene selâse ve sittin ve elf. Şuhûdü’l-hâl: Es-Seyyid Mehmed Efendi b. es-Seyyid Ali Efendi, Ali Bey b. Satılmış, Mehmed Beşe b. Muslı, Pîrî Beşe b. Hüseyin, Ali Beşe b. Şa‘ban el-Kayyım, el-Hâc Mustafa Efendi b. Mehmed, Ali Bey b. Mehmed, Rıdvan b. Abdullah, Mehmed b. Mustafa.