Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 96 Hüküm no: 85 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in Rus asıllı kölesini kitâbet ile azat ettiği Mahmiye-i İstanbul’da Hocapaşa kurbünde Elvanzâde Mahallesi sâkinelerinden Fâtıma bt. Mehmed nâm hatun tarafından husûs-ı âtîye vekîl olup vekâleti mezbûre Fâtıma’yı ma‘rifet-i şer‘iyye ile ârifân olan Şeyh Kasım Efendi b. Hamza ve Abdülbâki Çelebi b. İbrahim şehâdetleriyle sâbit olan mahmiye-i mezbûrede merhûm Ahi Çelebi Câmi‘-i şerîfinde şeyh ve nâsih olan umdetü’l-ârifîn Şeyh İbrahim Efendi b. Şeyh Karabaş mahfil-i şer‘-i şerîfde açık kaşlı, gök gözlü, orta boylu, sağ elinde eser-i cerh olan Rusiyyü’l-asl hâfız-ı hâze’l-kitâb Yusuf b. Abdullah muvâcehesinde bi’l-vekâle ikrâr ve takrîr-i kelâm edip mevsûf-ı mezbûr Yusuf müvekkilem mezbûre Fâtıma’nın abd-i memlûkü olup mukaddemâ on dört bin akçeye kitâbete kesip hâlâ bedel-i kitâbet olan on dört bin akçeyi müvekkile-i mezbûre merkūm Yusuf yedinden bi’t-tamam ahz u kabz edip mezbûr Yusuf sâir ahrâr-ı asliyyîn gibi hür olup üzerinde hakk-ı velâdan gayrı hakkı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb sebt ü ketb olundu. Fi’t-tâsi‘ ve’l-ışrîn min-şehri Ramazani’l-mübârek li-sene selâse ve sittin ve elf. Şuhûdü’l-hâl: ...? Râkım? Mustafa Efendi, Şa‘ban Efendi el-imâmü’l-mescid el-vâki‘ bi’l-mahalle, Şeyh Mehmed Çelebi b. Musa Efendi el-imâm, Süleyman Efendi b. Selman, Ali Efendi eş-şehîr Bahriye Kâtibi.