İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 539 Hüküm no: 692 Orijinal metin no: [61b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan Hâtun ile İbrahim b. Mustafa’nın muhâlaa yoluyla boşandıkları Hul‘ Mahmiye-i İstanbul’da Molla Hüsrev mahallesinde sâkine, İsmihan bt. ( ) nâm hâtun tarafından husûs-ı âti’l-beyâna vekîl olup zâtı ma‘rifet-i şer‘iyye ile ârifân İmâm Abbas Efendi b. İbrahim ve Sâlih Çelebi b. Abdullah nâm kimesneler şehâdetleri ile vekâleti sâbite olan babası münâdî aşçı Mehmed b. Nurullah nâm kimesne meclis-i şer‘-i hatîrde müvekkile-i mezbûre İsmihan Hâtun’un zevci İbrahim b. Mustafa mahzarında bi’l-vekâle ikrâr ve takrîr-i kelâm edip kızım müvekkile-i mezbûre İsmihan mezbûr İbrahim ile zimmetinde mütekarrir ve ma‘kūdun-aleyh iki bin akçe mehr-i müecceli ve nafaka-i iddet-i ma‘lûmesinden fâriğa olup ve me’ûnet-i süknâsı dahi kendi üzerine olmak üzre, muhâla‘a-i sahîha-i şer‘iyye ile muhâla‘a eyledikde mezbûr İbrahim dahi hul‘-ı mezbûru kabûl eyledikden sonra zevciyyete ve gayra müte‘allika da‘vâdan her biri âharın zimmetini ibrâ ve iskāt eyledi dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâdis min Saferi’l-hayr li sene erba‘a ve seb‘în ve elf. Şuhûdü’l-hâl: Hüseyin Efendi el-Brusî, el-Hâc Ahmed b. Mahmud, Hüseyin b. Ebûbekir, Abdi b. Hüseyin, Şükrullah b. Mustafa, Resûl b. Rıdvan.