İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 539 Hüküm no: 693 Orijinal metin no: [61b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âtike Hâtun’a ait olan mirasın, Mehmed Efendi ve Sâliha Hâtun’dan alınarak iade edilmesi İsbât-ı verâset Fi’l-asl vilâyet-i Anadolu’da Trabzon sancağında Rize kazâsı ahâlîsinden olan Mahmud b. Bâli nâm kimesne tarafından husûs-ı âti’z-zikre vekîl olup kasaba-i Rize ahâlîsinden Ali Beşe b. Hasan ve Osman Bey b. Mehmed şehâdetleri ile hasm-ı câhid-i şer‘î mahzarında vekâleti sâbite olan Âtike nâm hâtun meclis-i şer‘de medîne-i Galata müzâfâtından Rumeli Hisârı dâhilinde sâkine iken mukaddemâ vefât eden Sultan bt. Bâli nâm hâtunun terekesine vâzı‘u’l-yed olan zevc-i metrûkü Mehmed Efendi ile zî-rahm cihetinden vârisesi Sâliha bt. Abdullah nâm hâtun mahzarlarında bi’l-vekâle üzerlerine da‘vâ edip müvekkilim babam mezbûr Mahmud müteveffât-ı merkūme Sultan Hâtun’un li ebeveyn karındaşı olup babaları mezbûr Bâli ve anaları İsmibeşe bt. ( ) nâm hâtun ve maskat-ı re’sleri kasaba-i Rize olup müvekkil-i mezbûra irsen intikāl eden nısf-ı terekeyi, terekeye vâzı‘u’l-yed olan mezbûr Mehmed Efendi ve Sâliha Hâtun’dan vekâleten taleb ederim, suâl olunsun dedikde gıbbe’s-suâl mezbûrân tereke-i müteveffât-ı merkūmeye vaz‘-ı yedlerini ikrâr, lâkin müvekkil-i mezbûr Mahmud’un vech-i muharrer üzre verâsetini inkâr eyledikde mezbûre Âtike Hâtun’dan verâset-i merkūmeyi müsbite beyyine taleb olundukda udûl-i müslimînden kasaba-i mezbûre ahâlîsinden Bostan Beşe b. Hasan ve Ali Beşe b. İbrahim nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müvekkil-i mezbûr Mahmud müteveffât-ı merkūme Sultan Hâtun’un li ebeveyn karındaşıdır, babaları mezbûr Mahmud ve anaları İsmibeşe bt. ( ) nâm hâtun ve maskat-ı re’sleri kasaba-i mezbûredir, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm mezbûr Mehmed Efendi kendi yedinde olan terekenin nısfını, mezbûre Sâliha Hâtun dahi kabz eylediği tereke-i müteveffât-ı merkūmeyi müvekkil-i mezbûr Mahmud için vekîl-i mezbûr Âtike Hâtun’a teslîme mezbûrândan her birine tenbîh olunup mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene 1074. Şuhûdü’l-hâl: Mahmud Ağa, İbrahim Çavuş el-Mübâşir, Ahmed Çelebi b. Mahmud, Şükür Bey, Abdi Çelebi.