İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 540 Hüküm no: 694 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çavuş b. Abdullah’ın evini Yani v. Mavridi’ye sattığı Mülknâme Dergâh-ı âlî -dâme merci‘an li’l-âlî- yeniçerilerinden otuz ikinci oda ahâlîsinden Mustafa Çavuş b. Abdullah meclis-i şer‘-i hatîr-i lâzımü’t-tevkīrde kuyumcu tâifesinden işbu bâ‘isü’s-sifr Yani v. Mavridi muvâcehesinde ikrâr ve takrîr-i kelâm edip vilâyet-i Anadolu’da medîne-i Trabzon’da Firenk Hisârı mahallesinde vâki‘ bir tarafı Mavridi nâm zimmî mülkü ve bir tarafı kilise ve bir tarafı sâhil-i bahr ve bir tarafı tarîk-i âm ile mahdûd bir bâb tahtânî oda ve bir çardak ve bir fırın ve bir anbar ve bir sofa ve hadîka ve içinde nâbit on bir aded zeytin ağacı ve havluyu müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık yüz elli sekiz riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ol dahi minvâl-i muharrer üzre iştirâ ve kabûl eyledikden sonra, semeni olan meblağ-ı mezbûr yüz elli sekiz riyâlî guruşu müşterî-i mezbûr Yani’den tamâmen ahz u kabz edip mebî‘-i mahdûd-ı mezbûru mahallinde zabt ve tasarrufuna mezbûr Yani’yi taslît eyledim ba‘de’l-yevm menzil-i mahdûd-ı mezbûr, mezbûr Yani’nin mülk-i müşterâsıdır, mahallinde keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Saferi’l-hayr li sene erba‘a ve seb‘în ve elf. Şuhûdü’l-hâl: Ahmed Bey b. Fazlı, el-Hâc Ömer b. Ayas, Ahmed Beşe b. Ramazan, Mehmed b. Maksud, el-Hâc Mehmed b. Musa el-bakkal, Ali Beşe b. Abdullah, Süleyman Çelebi b. Mehmed, Mehmed Çelebi Kaşıkçızâde, Ahmed Ağa Hüsamzâde, Abacı Hasan Çelebi, Süleyman b. Abdullah, Mehmed b. Ramazan.