İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 541 Hüküm no: 696 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Çelebi b. Osman’ın kendisine ait olan evin yarı hissesini, karısı Fâtıma Hâtun bt. Musa’ya sattığı Mülknâme Mahmiye-i İstanbul’da kazasker Mehmed Efendi mahallesinde sâkin Halil Çelebi b. Osman nâm kimesne meclis-i şer‘-i hatîr-i lâzımü’t-tevkīrde zevcesi Fâtıma Hâtun bt. Musa tarafından ikrâr-ı âtîyi tasdîke vekîl olan Seyfullah Efendi b. Osman mahzarında tav‘an ikrâr ve takrîr-i kelâm edip nısfı benim ve nısf-ı âharı zevcem müvekkile-i mezbûre Fâtıma Hâtun’un mülkü olup mahalle-i mezbûrede vâki‘ bir cânibi Durmuş nâm sâhib-i hayrın süknâsını sulehâya şart eylediği menzile ve bir cânibi utekāya vakf olan menzile ve bir cânibi kârize ve bir cânibi tarîk-i âm müntehî olup hâriciyyesi bir bâb fevkānî odayı ve sofa ve kenîf ve ahırı ve dâhiliyyesi, iki bâb fevkānî odayı ve iki sofayı ve altında ahırı ve su kuyusunu ve kenîfi ve bahçeyi müştemil mülk menzilden nısf hisse-i şâyi‘amı yirmi bin fıddî râyic fi’l-vakt akçeye zevcem müvekkile-i mezbûre Fâtıma Hâtun’a bey‘-i kat‘î ile bey‘ ve teslîm ol dahi minvâl-i muharrer üzre iştirâ ve tesellüm eyledikden sonra, semeni olan yirmi bin akçeyi yedinden alıp kabz eyledim min ba‘d menzil-i mezbûr mezbûre Fâtıma Hâtun’un mülkü olmuşdur keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’l-mu‘teber, mâ vaka‘a bi’t-taleb ketb olundu. Fi’l-yevmi’t-tâsi‘ min Saferi’l-hayr li sene 1074. Şuhûdü’l-hâl: El-Hâc Mustafa b. Kasım, Abdullah Çelebi b. Mehmed, Abdullah Çelebi b. Hüseyin, el-Hâc Yusuf b. Abdullah, Hasan Efendi el-İmâm, Yedekçizâde Mehmed Çelebi el-Cündî Ahmed Çelebi b. Mahmud, Abdi Çelebi.