İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 542 Hüküm no: 697 Orijinal metin no: [62a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebubekir Efendi’nin çocuklarına ödeyeceği nafakada indirim yapılması Hatt-ı nafaka İşbu kitâb-ı sıhhat-nisâbın tahrî[ri]ne bâ‘is olan fahrü’l-müderrisîni’l-kirâm Ebûbekir Efendi meclis-i şer‘-i hatîrde zevce-i mutallakası Fâtıma bt. Mehmed nâm hâtun mahzarında takrîr-i kelâm edip mezbûre Fâtıma Hâtun’un bi hakki’l-hidâne hacr ve terbiyesinde olan sulbiye kızlarım Emine ve Hamîde nâm sagīrelerden her birine nafaka ve kisve ve sâir levâzım-ı zarûriyyesi için mezbûre talebi ile üzerime yevmî on beş akçe takdîr olunmuş, lâkin ben fukarâ-i müderrisînden olup her birine ol mikdâr akçeyi vermeye iktidârım olmayıp ve yevmî beş akçe kifâyet etmeğin on akçesi hat olunmak matlûbumdur dedikde fi’l-vâki‘ kıssa müşârün-ileyh Ebûbekir Efendi’nin takrîri üzre olmağın onar akçesi hat olunup kisvelerinden hâric ancak nafakaları için beşer akçe kalmağın, mâ hüve’l-vâki‘ bi’t-taleb ketb olundu. Fi’l-yevmi’s-sâdis min Saferi’l-hayr li sene erba‘a ve seb‘în ve elf. Şuhûd[ü’l-hâl]: Abdünnebî Ağa b. ( ), Abdülkerim Ağa, Ali Beşe çukadar.