İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 544 Hüküm no: 701 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mahmud’un yeniçeriler odasından bey‘ bi’l-istiğlâl yoluyla ödünç aldığı İstiğlâl Mahmiye-i İstanbul’da Cafer Ağa mahallesinde sâkin Mehmed Çelebi b. Mahmud nâm kimesne meclis-i şer‘de Dergâh-ı âlî yeniçerilerinin dördüncü Deveciler odasının nukūd-ı mevkūfesine mahsûs vakıf akçeye mütevellî olan işbu bâ‘isü’l-kitâb Mustafa Odabaşı b. Abdullah mahzarında ikrâr ve takrîr-i kelâm edip mahalle-i mezbûrede vâki‘ iki tarafı Medîne-i Münevvere vakfı ve bir tarafı Mehmed Çavuş mülkü ve bir tarafı tarîk-i hâs ile mahdûd mülk menzilimi, mütevellî-i merkūm Mustafa Beşe’ye sekiz bin nakd-i râyic fi’l-vakt akçeye bi tarîki’l-istiğlâl bey‘ ve teslîm ol dahi yedinde olan mâl-ı vakf-ı mezbûr ile iştirâ ve kabûl ettikden sonra meblağ-ı mezbûr sekiz bin akçeyi mütevellî-i merkūm Mustafa Beşe yedinden tamâmen ahz u kabz eyledikden sonra yine menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına dek on altı riyâl guruşa mütevellî-i mezbûr bana îcâr ve teslîm ben dahi vech-i muharrer üzre istîcâr ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Saferi’l-hayr li sene 1074. Şuhûdü’l-hâl: Ramazan Beşe seroda, Hoca Ali b. Mehmed, Mehmed Çelebi b. Mehmed, Mehmed Ağa b. Mustafa, İbrahim b. Mehmed, Hüseyin Beşe b. Ali, Mehmed b. Mustafa, Ömer Beşe, Resûl b. Rıdvan.