İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 550 Hüküm no: 710 Orijinal metin no: [63a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi ve Dilsiz Mehmed Ağa arasındaki borç davası Men‘ Bundan akdem defter kethüdâsı iken vefât eden Ebûbekir Efendi b. Ömer’in verâseti, zevce-i metrûkesi Ayşe bt. ( ) nâm hâtun ile li ebeveyn karındaşı Mehmed Çelebi’ye münhasıra oldukdan sonra mezbûr Mehmed Çelebi Dîvân-ı kāimmakām-ı sadr-ı a‘zamîde akd olunan meclis-i şer‘de işâret-i ma‘hûdesi nutuk makāmına kāim olan Bîzebân Mehmed Ağa b. Arslan muvâcehesinde üzerine da‘vâ edip mûrisim müteveffâ-yı mezbûr Ebûbekir Efendi sıhhatinde mezbûr bî-zebân Mehmed Ağa’ya karz dört yüz elli riyâlî guruş verdikden sonra kable’l-ahz vefât edip meblağ-ı mezbûrun selâse-i erbâ‘ı irsen bana intikāl etmekle mezbûrdan taleb ederim, suâl olunsun dedikde gıbbe’s-suâl mezbûr bî-zebân Mehmed Ağa cevâbında mezbûrun işâret-i ma‘hûdesine âlimler olup âdiller olan Mahmud Çelebi ve Mehmed Beşe nâm mütercimler tercümeleri ile tefhîm-i merâm edip bundan akdem mezbûr Ebûbekir sıhhatinde Çepe Dilsiz nâm kimesneden karz aldığı bin iki riyâlî guruşun sekiz yüz guruşu[nu] mezbûra menzilinde edâ ve teslîm eyledikde bâkī kalan dört yüz elli guruşunu sen malından mezbûra verip ba‘dehû ben sana edâ ederim deyû bana emir etmekle ben dahi emrine binâ’en mezbûr Çepe Dilsiz’e kendi malımdan verdiğimden sonra, mezbûr Ebûbekir Efendi’den aldığım dört yüz elli riyâlî guruşu emri ile verdiğim akçedir deyû def‘ ile mukābele eyledikde gıbbe’l-istintâk mezbûr Mehmed Çelebi mezbûr Mehmed Ağa’nın mezbûr Çepe Dilsiz’e mûrisinin dört yüz elli riyâlî deynini verdiğini ikrâr, lâkin vech-i muharrer üzre emrini inkâr eyledikde mezbûr Mehmed Ağa’dan müdde‘âsı için beyyine taleb olundukda udûl-i müslimînden Şeyh Sadi mahallesinde Hasan b. Mehmed ve Mehmed b. el-Hâc Ali nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ mezbûr Ebûbekir Efendi hâl-i sıhhatinde Çepe Dilsiz’e sekiz yüz riyâlî guruşu verdikde mezbûr bî-zebân Mehmed Ağa’ya dört yüz elli riyâlî guruşu sen kendi malından ver, ba‘dehû ben sana vereyim deyû huzûrumuzda emr etmekle ol dahi meblağ-ı mezbûru emrine binâ’en kendi malından verdi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mezbûr Mehmed Çelebi bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin min [Saferi’l-hayr li sene 1074]. Şuhûdü’l-hâl: Abdünnebî Ağa, Abdülkerim Ağa sermuhzır ağa, Ali Beşe b. Osman Çukadar, (..?).