İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 552 Hüküm no: 713 Orijinal metin no: [63b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çukurbostan’da oturan Ali adlı şahsın ölümüyle terekesinin vârisleri arasında taksimi Mülknâme Mahmiye-i İstanbul’da Sultân Selim kurbunda Çukurbostan’da fevt olan Ali nâm kimesnenin verâseti, zevce-i metrûkesi Gülperi bt. Abdullah nâm hâtun ile kebîr oğlu Mehmed’e ve kebîre kızları Fâtıma ve Meryem ve Hatîce’ye ve sagīre kızı Emetullah’a münhasıra olup kable’l-kısme mezbûre Meryem fevt olup verâseti vâlidesi mezbûre Gülperi ile li ebeveyn karındaşı merkūm Mehmed’e ve li ebeveyn kız karındaşları mezbûretân Fâtıma ve Emetullah’a münhasıra olup kable’l-kısme mezbûre Gülperi fevt olup verâseti sadrî kebîr oğlu mezbûr Mehmed’e ve sadriyye kebîre kızları mezbûretân Fâtıma ve Emetullah nâm sagīre münhasıra olup bi tarîki’l-münâsaha tashîh-i mes’eleleri bin yüz elli iki sehimden olup sihâm-ı mezbûreden dört yüz doksan iki sehmi mezbûre Mehmed’e ve ikişer[den] kırk altışar sehmi mezbûretân Fâtıma ve Emetullah’dan her birine ve yüz altmış sekiz sehmi mezbûre Hatîce’ye isâbet eylediği şer‘an zâhir oldukdan sonra mezbûr Ahmed ve mezbûre Fâtıma ve Hatîce meclis-i şer‘-i hatîrde râfi‘atü’l-kitâb Emine Hâtun bt. Mehmed muvâcehesinde her biri ikrâr ve takrîr-i kelâm edip zikr olunan Çukurbostan’da vâki‘ bir tarafı imâma meşrût vakıf menzil ve bir tarafı Hatîce Hâtun tasarrufunda olan menzil ve tarafeyni tarîk-i âm ile mahdûd fevkānî ve tahtânî büyût ve kenîf ve havluyu müştemil olup bin yüz elli iki sehim i‘tibâr olunur müteveffâ-yı evvelin terekesinden olan menzilden bâlâda ta‘yîn olunduğu vech üzre bize isâbet eden dokuz yüz altı sehim hisse-i şâyi‘amızı mezbûre Emine Hâtun’a yirmi bir bin yüz yetmiş beş akçeye bâtten bey‘ ve teslîm edip ol dahi iştirâ ve kabûl ettikden sonra, meblağ-ı mezbûru tamâmen alıp kabz eyledik. Menzil-i mezbûrda bâlâda beyân olunduğu üzre bize intikāl eden hissemiz merkūme Emine’nin mülk-i müşterâsıdır keyfe mâ yeşâ’ mutasarrıfe olsun dedikde gıbbe’t-tasdîki’ş-şer‘î sagīre-i mezbûre Emetullah’ın vasiyy-i şer‘îsi Mehmed Çelebi nâm kimesne meclis-i şer‘-i hatîrde mezbûre Emine muvâcehesinde bi’l-vesâye ikrâr ve i‘tirâf edip vasîsi olduğum sagīre-i mezbûre Emetullah’ın menzil-i mezbûrda olan iki yüz kırk altı sehim hisse-i şâyi‘ası kābil-i intifâ‘ olmayıp bey‘ olunup semeni istiğlâl olunmak sagīre-i mezbûreye nâfi‘ olmağın vesâyetim hasebiyle sagīre-i mezbûrenin menzil-i mezbûrdan kendiye isâbet eden iki yüz kırk altı sehim hissesini semeni olan beş bin yedi yüz elli akçeye mezbûre Emine’ye bey‘-i kat‘î ile bey‘ ve teslîm eyleyip ol dahi ba‘de’l-kabûl meblağ-ı mezbûru sagīre-i mezbûre için mezbûre yedinden alıp kabz eyledim ba‘de’l-yevm mezbûrenin mülk-i müşterâsıdır dedikde gıbbe’t-tasdîki’l-vicâhî, mâ vaka‘a bi’t-taleb ketb olundu. Fi’l-yevmi’s-sâbi‘ min Saferi’l-hayr li sene 1074. Şuhûdü’l-hâl: Ali Efendi el-hatîb, el-Hâc Ahmed b. Mahmud, Şükrullah Bey b. Mustafa, Abdi Çelebi b. Hüseyin.