İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 553 Hüküm no: 714 Orijinal metin no: [63b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avak v. Kirkor’un, Yedekçi Mehmed Bey’den aldığı emanet eşyayı vârislerine iade ettiği İkrâr bi kabzı emânet Mahmiye-i Edirne’de sâkin iken bundan akdem vefât eden Yedekçi Mehmed Bey b. Osman’ın hasren vârisesi li eb kız karındaşı Fâtıma Hâtun meclis-i şer‘-i şerîf-i lâzımü’t-teşrîfde, işbu bâ‘isü’s-sifr Avak v. Kirkor muvâcehesinde üzerine da‘vâ ve takrîr-i kelâm edip karındaşım müteveffâ-yı mezbûr Mehmed Bey hâl-i sıhhatinde işbu hâzır bi’l-meclis Yusuf Bey b. Abdullah’a yedi ile mezbûr Avak Ermeni’ye emânet tarîki üzre vaz‘ ve teslîm eylediği bir köhne at kebesi ve bir Selânik orta keçesi ve bir beledî döşek ve iki köhne yorgan ve köhne seccâde ve bir köhne keçe ve bir köhne kapı perdesi ve bir köhne yan keçesi ve iki köhne kebe ve bir köhne orta keçesi ve bir yemeni yastık ve bir kılıf ve iki köhne velense ve bir köhne yorgan ve bir köhne sandık ve bir sepet sandığı içinde bir mikdâr hırdavât ve iki na‘lbeki ve iki sagīr şerbet tası ve bir cam tası ve bir tepsi ve bir buhurdanlık ve bir leğen ve bir sahan ve iki güğüm ve bir köhne pîştahta ve bir frenk sandığı mezbûr Avak yedinden ahz u kabz eyledim min ba‘d mezbûr Avak yedinde mûrisim mezbûrun emânet vaz‘ ettiği eşyâsından bir nesne bâkī kalmadı dedikde mukırra-i mezbûrenin ikrâr-ı meşrûhunu mezbûr Avak vicâhen ve şifâhen tahkīk ve tasdîk etmeğin mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharremi’l-harâm li sene 1074. Şuhûdü’l-hâl: Es-Seyyid Hasan b. es-Seyyid Ahmed, Musa b. Mehmed, Hüseyin b. Hasan, Ahmed b. Süleyman, Abdi Çelebi b. Hüseyin, Şükür Bey b. Mustafa, Mehmed b. Ramazan.