İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 557 Hüküm no: 720 Orijinal metin no: [64a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Mihal’in, ölmüş olan Toma adlı patrikteki alacağını kefil olanlardan tahsil ettiği Sulh Mahrûse-i Galata’da Sultân Bayezid mahallesi sükkânından Nikola v. Mihal nâm zimmî meclis-i şer‘de Sama[r]on v. Haçador ve Bağdasar v. Avanos ve Şehri v. Aydoğdu ve Zakarya v. Mayo nâm Ermeniler muvâcehesinde ikrâr ve i‘tirâf edip bundan akdem hâlik olan Toma nâm patrikde olan iki bin yüz yirmi riyâlî guruş hakkıma siz kefîl olmuş idiniz deyû mezbûrun Ermeniler’den da‘vâ ve beynimizde küllî nizâ‘ vukū‘undan sonra vesâtat-ı muslihîn birle mezbûrun da‘vâ-yı mezbûremden beni on üç bin iki yüz yirmi akçe üzerine inşâ-i akd-i sulh ettiklerinde, ben dahi sulh-ı mezbûru ba‘de’l-kabûl meblağ-ı mezbûru tamâmen yedlerinden alıp kabz edip kefâlete müte‘allika âmme-i da‘vâdan ve beynimizde ma‘lûm hançer ve gaddâre da‘vâsından mezbûrun Zakarya ve Bağdasar ve Şehri ve Samaron’un her birinin zimmetlerin ibrâ-i âm ile ibrâ ve iskāt eyledim ba‘de’l-yevm husûs-ı mezbûra müte‘allika vechen mine’l-vücûh ve sebebin mine’l-esbâb mezbûrun ile da‘vâ ve nizâ‘ ve husûmetim yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene erba‘a ve seb‘în ve elf. Şuhûdü’l-hâl: Es-Seyyid Ahmed Efendi b. es-Seyyid Ahmed Çelebi, Hasan Çelebi b. Abdullah, Ali Ağa b. Abdullah, Sinan b. Ahmed, Mehmed b. Abdullah.