İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 558 Hüküm no: 722 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Bayezid mahallesinden Andon v. Yani’nin evini Zoya bt. Banbolnoz’a sattığı Mülknâme Medîne-i Galata’da Sultan Bayezid mahallesinde sâkin Şekerci Andon v. Yani zimmî tarafından husûs-ı âtîye vekîl olup Hasan Çelebi b. Ali ve Şaban Çelebi b. el-Hâc Ali nâm kimesneler şehâdetleri ile vekâleti sâbite olan Kostantin v. Manol nâm zimmî meclis-i şer‘-i hatîr-i lâzımü’t-tevkīrde zevcesi Zoya bt. Banbolnoz nâm nasrâniyye tarafından tasdîk-i âtîye vekîl olan sarrâc Andriye v. Manol nâm zimmî mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Andon’un silk-i mülkünde münselik olup mahmiye-i İstanbul hısnı ebvâbından Petro kapısı hâricinde vâki‘ bir cânibi Bâkīzâde Esad Efendi mülküne ve bir cânibi Kâtib Mehmed Çelebi mülküne ve bir cânibi sâhil-i bahr ve bir cânibi tarîk-i âm müntehî iki bâb fevkānî odayı ve bir dehlizi ve iki bâb tahtânî odayı ve bir sofa ve kenîfi ve iki mahzeni ve su kuyusunu müştemil menzilini, tevâbi‘ ve levâhıkı ve kâffe-i hukūk ve merâfıkı ile zevcesi müvekkile-i mezkûre Zoya’ya sekiz yüz Üngürüs altını ile yüz riyâlî guruşa tarafeynden îcâb ve kabûlü hâvî bey‘-i bâtt-ı sahîh ile bey‘ ve teslîm ol dahi minvâl-i muharrer üzre iştirâ ve tesellüm eyledikden sonra, semeni olan meblağ-ı mezkûr sekiz yüz altın ve yüz riyâlî guruşu ba‘de’l-kabz mezkûr Zoya’ya hibe-i sahîha-i şer‘iyye ile hibe ve teslîm ol dahi ittihâb ve tesellüm eyledi. Min ba‘d menzil-i mezbûr mezkûrenin mülk-i müşterâsı ve semen-i mezkûr mülk-i mevhûbu olsun dedi dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene erba‘a ve seb‘în ve elf. Min hicreti men lehü’l-izzü ve’ş-şeref. Şuhûdü’l-hâl: Hüseyin Efendi el-Bursevî kâtibü’l-hurûf, fahrü’l-kuzât Mehmed Efendi b. el-Hâc İsmail, Keşfî Mustafa Efendi el-Kâtib, el-Hâc Şaban b. Abdurrahman, Hasan Beşe b. Ali er-Râcil, İbrahim Çelebi b. ( ), Keresteci Şaban Çelebi b. el-Hâc Ali, kâtib-i çavuşân Mehmed Çavuş b. Ahmed, Hüseyin Çelebi b. Ahmed el-Hammâmî, Ahmed b. Mahmud kethüdâ-yı muhzırân, Ali Beşe b. Osman Çukadar, Berber Yusuf b. Mansur, el-Hâc Mustafa Berber, Mustafa Beşe b. Rıdvan, Abdi Çelebi b. Hüseyin, Laskari v. Manol, Kalemkâr Mihail v. Andriye, Komari kapı kethüdâsı, İlya v. Nikola, Hayyât İstemad, Tarako v. Yani, Kostantin v. Bülbül, sarrâc Tiryaki, Dimitraşko v. Kuli, Yanaki v. Nikola, Laskari v. Manol müsellem, Mihalaki v. Yanaki ve gayruhüm.