İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 561 Hüküm no: 727 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beşiktaş Yeni mahalleden Ayşe bt. Muharrem ile Ali Beşe b. Ali’nin muhâlaa yoluyla boşandıkları Hul‘ Medîne-i Galata kazâsına tâbi‘ kasaba-i Beşiktaş mahallâtından Yeni mahallede sâkine Ayşe bt. Muharrem nâm hâtun meclis-i şer‘-i hatîr-i lâzımü’t-tevkīrde zevci Ali Beşe b. Ali tarafından hul‘ ve ibrâya vekîl olup Mehmed Beşe b. Ali ve Ali Beşe b. Mustafa nâm kimesneler şehâdetleri ile vekâleti sâbite olan vâlidesi Ümmühânî bt. Abdullah nâm hâtun mahzarında ikrâr ve takrîr-i kelâm edip zevcim mezbûr Ali Beşe zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre merkūme Ümmühânî Hâtun ile muhâla‘a-i sahîha-i şer‘iyye ile muhâla‘a edip ol dahi vekâleti hasebiyle hul‘-ı mezbûru kabûl eyledikden sonra zevciyyete müte‘allika her birimiz âharın zimmetini ibrâ ve iskāt eyledik dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene erba‘a ve seb‘în ve elf. Şuhûdü’l-hâl: Mehmed Beşe b. Hüseyin, İbrahim Beşe b. Mehmed el-Mübâşir, Ali Beşe b. Osman Çukadar, Resûl b. Rıdvan, Mehmed b. Ramazan.