İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 561 Hüküm no: 726 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hâtun bt. Abdullah’ın, kocası el-Hâc Musa b. Ali’nin terekesinden hakkını aldığı İbrâ Mahmiye-i İstanbul’da Saraçhâne kurbunda Mi‘mâr Ayas mahallesi sâkinlerinden olup fevt olan el-Hâc Musa b. Ali’nin verâseti, zevce-i metrûkesi Hatîce Hâtun bt. Abdullah ile ibn ammi Mustafa Çelebi b. Ahmed Ağa’ya münhasıra olduğu şer‘an müte‘ayyin oldukdan sonra mezbûre Hatîce Hâtun tarafından husûs-ı âti’l-beyâna vekîl olup mezbûreyi bi’l-ma‘rifeti’ş-şer‘iyye ârifân olan fahrü’l-eimme Abdüllatif Efendi b. Mehmed ve Müezzin Hasan Çelebi b. Muharrem şehâdetleri birle vekâleti sâbite olan Mustafa b. Ahmed nâm kimesne meclis-i şer‘-i hatîrde râfi‘ü’l-kitâb mezbûr Mustafa Çelebi muvâcehesinde bi’l-vekâle ikrâr ve i‘tirâf edip müvekkilem mezbûre Hatîce zevcim mezbûr el-Hâc Musa hayâtında mahalle-i mezbûrede vâki‘ her birinin hudûdu beyne’l-ahâlî ma‘lûm iki kıt‘a menzilinin bir kıt‘asın bana ve bir menzili dahi mezbûr Mustafa Çelebi’ye hibe-i sahîha-i şer‘iyye ve temlîk eylemiş idi hâlâ fevt oldukdan sonra akār ve menkūl ve urûz ve esâs-ı beyt ve sâir kalîl ü kesîr ve celîl ü sagīr cemî‘ terekesinden dört sehimden bana isâbet eden bir sehim hisse-i şer‘iyyemi ve üç bin akçe mehr-i müeccelimi mezbûr Mustafa Çelebi yedinden tamâmen alıp kabz eyledim min ba‘d müteveffâ-yı mezbûrun terekesinde bir akçe ve bir habbe hakkım bâkī kalmadı ve husûs-ı mezbûra müte‘allika mezbûr Mustafa Çelebi üzerine da‘vâ ve nizâ‘ ve husûmetim yoktur dedi dedikde gıbbe’t-tasdîki’ş-şer‘î mâ vaka‘a gıbbe’t-taleb ketb olundu. Fi’l-yevmi’l-hâmis aşer min Saferi’l-hayr li sene erba‘a ve seb‘în ve elf. Şuhûdü’l-hâl: Abdüllatif Efendi el-İmâm, Hasan Çelebi el-Müezzin, el-Hâc Mustafa b. el-Hâc Osman, el-Hâc Hasan b. Mustafa es-Sarrâc, Mehmed Çelebi b. Yusuf es-Sarrâc, Hasan Beşe es-Sarrâc, Hasan Beşe b. İbrahim, Mustafa Çelebi b. İbrahim.